Bajang Pingitan
Olih: Komang
Sri Puspa Déwi
![]()
Komang Sri Puspa Déwi
sisia SMAN Bali Mandara kelas XII MIPA 2.
 |
| Sumber Gagambaran; id.pinterest.com |
“Nyesel sajan i déwék
kéné, apa ja ané gaénin sing dadi jemak.” Kéto sesel anak Luh ento saha namplak
méja ané ada di tengah kamarné.
“Nguda kéné nasibé ,
suba numitis kéné ané bakat. Apa ajiné tiang di guminé? Mekejang sing dadi
jemak.” Kéto seselné
Kandeng yéh
peninangalané saha ngrubéda nyerécékin pipiné ané putih ento.
Saget kanti duang jam
Ni Nyoman Sasih ngeling. Sing ada né bisa rungu tekén pawundukané
jani. Sebet ané sanget karasayang.
Laut ada kerékan munyin
pintu né masuk ka kamarné.
“Béh, éngkén adi
ngeling ning?” kéto abet méméné.
“Mé, suud ngurung
tiang kéné mé. Med tiang di kamaré né.Tiang sampun kelih mé diolas
baang tiang pesu.” Kéto pengidihné Nyoman Sasih tekén méméné.
“Éngkén cening adi kéné
buin? Ning, mémé kéné ulian ada alasané, né demi kebaikan ceningé. Mémé lan
bapa takut kalahin cening,” kéto raos méméné jejeh.
“Bih tiang sing
kuat mé, tiang nak dot cara anak lénan mé, né kemu mai dadi ideh-ideh
tur maguna. Yén cara jani, tiang pocol hidup yén hidup cara penjara, nah adanan
tiang mati.” Sesel Nyoman Sasih.
Liman Mén Sasih sépanan
saget ngenanin pipin Ni Nyoman Sasih.
“Aduh sakit mé, mémé
namplak tiang? Mémé sing sayang ngajak tiang. Magedi mé.” Raos Ni Nyoman Sasih
sambilanga ngeling.
Ngeling Nyoman Sasih
laut sirep di pesirepané sambilanga mebading tundun saking sebetné ketamplak
méméné.
“Ning, mémé sing
makeneh namplak cening. Mémé sing dot cening ngelawan mémé. Mémé sayang tekén
cening,” atur méméné sambilang ngusap bok panakné.
“Kéné adané sayang?
Tersiksa tiang, mé. Megedi mé, depang tiang pedidi,” pinunas panakné.
Méméné nuutin pinunas
panakné, tau tekén déwékné pelih bes sanget ngekang pianakné cara kéné.
Inget ia tekén
pawundukan ipidan dugas ia ngelekadang Nyoman Sasih.
***
“Bli Madé, tiang dot
ngelah pianak bli. Men ba pang dua pragat ngugurang pianak bli. Sungsaya
keneh hatiné. Apa sida ja iraga buin ngelah pianak?” Kéto raos anak luh ento.
“Béh, sampunang I
Luh sungsaya buka kéto iraga pasti nyidang buin kepaica ngelah panak. Né jani
iraga patut ngastiti bakti mangda sida kapaica.” Kéto raos kurenané ngetisin
kenehné Ni Luh Sekar.
“Patut cara raos beliné,”
saha mekenyem manis.
Bawak satua, Ni Luh
Sekar sampun mobot. Lega pesan kenehné, Ni Luh Sekar tekén kurenané.
“Bli dot pesan tiang
tekén bé sampi, yén dadi tiang ngidih alihang ja tiang saté sampi bli,”
pinunasné Ni Luh Sekar tekén kuranené rikala mesandekan ajaka dadua di
balé bengongé.
“Béh, masan jani kéweh
ngalih bé sampi Luh. Lan jalan tagih ané lénan kén to,” kéto atur
kurenané.
“Bih sing nyak tiang,
tiang dot pesan tekén bé sampi. Yén bli sing ngalihang bé sampi jalan suba
tiang mati,” sambilanga jengis Ni Luh Sekar nyaurin kurenané.
“ Mih, sampunang I
Luh kéto. Nah jani bli lakar ngalihang bé sampi.”
“Inggih bli.”
Lantas cutetné kurenané
maan bé sampi laut ia kencanin angon saté buka pengidih kurenané.
Kacrita mangkin, Ni Luh
Sekar sampun ngembasang pianak luh. Kawastanin Ni Nyoman Sasih krana ia panak sané
kaping telu yadisatun nyama-nyamané ten embas ka guminé. Sasih kawastanin
krana ia embas rikala sasih kapitu nyaluk tumpek wayang.
Dugas Ni Nyoman Sasih
metuuh duang tiban, Ni Nyoman sasih gelem tur katakonanga kebalian.
“Béh, yén dados titiang
natarang, Ni Nyoman Sasih niki melik. Ipun melik ceciren santukan punika
beneh-benehang ngerawat ipun sampunang ipun sanget romon, tur sampunang ipun
pedidian. Pang ten ipun kaambil malih ring Hyang Parama Kawi,” kéto
pengaturné I Jero Balian dugas dinané ento.
Sekat ento Mén
Sasih lan Pan Sasih ngelarang Ni Nyoman Sasih meplalianan sareng cerik
lén-lénan. Engsek kenehné Ni Nyoman Sasih, dot kenehné cara anak cerik
lénan sané mecanda girang kadi punika. Sadina-dina ia meplalian ditengah kamaré
dogén.
Né mangkin ia sampun
matuuh 17 tiban nanging pateh sekadi ipidan. Ia tetep kakurung ring kamarné.
***
Mekesiab Mén Sasih ring
lamunané.
“Béh bli tengkejut
tiang, sagét di malun tiang bli léwat,” raos Ni Luh Sekar tekén kurenané.
“Bih I Luh
ngelamun kéto, ada apa Luh?” petakon kurenané.
“Kéné bli tiang inget
dugas tiang ipidan ngelekadang Ni Nyoman Sasih. Apa becikné iraga sing
ngelarang Ni Nyoman Sasih pesu? Tiang ngasanin Ni Nyoman Sasih tertekan bli.
Jani ia ngambul,” atur Ni Luh Sekar.
“Sing ja kenapa
to Luh. Kan suba biasa toh ia kéto. Da ba sanget
kenehanga binjepan ia pastika cara jati mula”
“Nggih bli lamun kéto.”
Mara Mén Sasih
nyautin munyin kurenané sagét dingeh munyin kursi ulung uli tengah kamarné Ni
Nyoman Sasih. Ngénggalang makakalih mecelep ka kamarné Ni Luh Sasih.
Mara macelep ka tengah
kamarné dapetanga panakné suba nyeleméh metegul ban tali, megantung buka
lampuné.
“Sasihhhhhhhhhhhhhhhhhhhhhhhhhhhhhhhhhhhhhhhhhhhhh”
***
Kubutambahan, 31 Maret 2019
sisia SMAN Bali Mandara kelas XII MIPA 2.
No comments