Puisi-puisi Raka Sukmadi; Ijo Gading Carik Renon
 |
| Ilustrasi olih Supartika |
Surya Téja Kembar
Ida cokorda madé dénpasar
Ida padanda madé Sidemen
Prabu lan wiku atatekén sastra
Ngulik aksara ngulati lengkara
Paras paros sarpanaya
Tios linggih beda lungguh
Nanging tunggal hrédaya
Nemuang suéca lan bakti
Ngardi rahayu badung ugi
Sang wiku nata raja rsi
Sarahina nyurya sewana
Ngaptiang jagaté galang
Ngeripta lelepihan
Nganutin rasa sasmita
Saking telenging ati
Wantah kasusilaning budi
Sida ngentasin segara sanghara
Tur selampah laku
Guna dusun
Nandurin karang awak
Sang kalih saksat téja kembar
Nyunarin badung ugi pulina bali
Tios wangsa beda pamargi
Macepuk ngerahayuang gumi
Nitya puja ring hyang aji
Tan sida pasah ring sajeroning caritta
Pinaka suluh patut tulad
Waluya sekar wangi
Tan kalayuan, salantang pamargi
Salampah urip
Wrespati umanis matal 2012
Dénpasar
Heritage
Balé kukul Tambang Badung
Saksi kalaning nguni
Pasemetonan Kibarak Panji
Sareng Anglurah Pemecutan
Satsat dasar pengawit
Kedatuan Badung
Pemecutan, Dénpasar lan Kesiman
Sida masikian
Sagilik saguluk magilir
Dados pamucuk
Ngetangan gumi
Ngawangun puri
Nangiang pura
Kawarisang nanak putu
Sané mangking sida pangguh
Tatamian leluhur adiluhung
Sisan puputan badung
Kaselametang dados muséum
Wantah tatujon torisé rawuh
Dénpasar kasub kasumbung
Sukerta dayuh landuh
Puputan
Soma pon matal 2012
Tongkang Sri Komala uwug
Kakedeng ka pesisi sanur
Punika wantah bantang
Ngelemigang bungut I Welanda
Nekepin uled basang
Makita nguasa badung
Nanging Cokorda Dénpasar
Sang ateken aji
Wruh ring sasmita
Pascat matetenger
Nyobiahang purwa sanghara
Ida lescara nekéng tuwas
Sudira sadia magutin welanda
Pinaka musuh gumi
Lasan mati timbang idup
Nyakupang lima mayah upeti
Sameton wargi saur manuk
Sumuyug sareng mebela pati
Nindihin gumi tanah palekadan
Sagilik saguluk
Salunglung sabayantaka
Reh rurung idup
Lan margi idep sampun matemu
Nunggal ring kayun
Tosing satria mahotama
Tan ulap déning pipis
Tan kobér, sura dira
Swarga ring tungtunging bedil
Lampus lanus
Puputan!
Ijo
Gading Carik Renon
“Ring cariké sane liggah
Pantunnyané sampun kuning
Icétrung ngelah pianak . . . .”
Sinom cétrung punika
Temon-temon warsa lawas
Anggén pangéling-éling
Carik renon badung ugi
Kasub pantun ijo gading
Jelih lambih kasumbung
Ke dura negari
Angin ngesisir aris
Ngetut ipian wong tani
Arip sejeroning kubu alit
Kemaon mangkin
Sami brasta magentos
Tetangunan beton ageng ngalik
Genah penggede ngetangin gumi
Lipia kawit lali indik
Maosang mélanin wong cilik
Rikalaning kampanye
Nanging sesubané suba
Prajani buta pramangkin bongol
Busan-busan ngaku repot
Nenten wenten galah
Miragi pakrimik rakyat
Pajeg tanah sayan nincap
Margi sayan cupit
Kosek nyepit sané alit
“Ratu Agung
Kenken abeté madaye”
embas ring Dénpasar duk warsa 1957. Alumni Fakultas Sastra Unud puniki sampun seneng ring sastra sedaweg dados mahasiswa. Né mangkin sampun purna bhakti saking Dinas Kebudayaan Provinsi Bali.
No comments