Puisi-puisi I Gdé Nyana Kesuma; Suluh Urip

Sumber potrekan; www.pexels.com

Suluh Urip

Idup di jamané jani 

Jaman sané katah kebaos

Jaman kaliuga

Ané selem bisa dadi putih

Ané putih bisa dadi selem

      Makasami campuh

      Tengah kalawan sisi

      Tusing ada misi

      Tusing karuan beneh 

      Tusing karuan pelih

Ané joh ngenahné luung

Ané di muncuk cunguhé

Tusing mabo

Liunan cara taluh semuuk

Tusing taen masuluh 

Ngapung

        Matempung

        Puyung

        Ulah-ulah ngenahné luung

        Pamuputné payu payu ulung

Yéhtengah, 2019

Bantang 

Pejalan idupé

Yén sing kangin kauh

Yén sing kaja kelod

Kengkén ja cara rodan pedatiné

Buin diuur buin di beténan

Mekeber melingser

Meguyang mangumbara

Nah né ja mula pejalan idupé

Jani nyen ngorang

Idupé aluh

Aluh cara madingan telapakan limané

Tusing

Tusing ja care ento patuté

Ané jani len bakat rasang

Sebet kalawan bagia 

Tusing pesan dadi palasang

Magenti ia teka

Pajalan mula pajalan

Tis kalawan panes

Utama lawan nista

Yehtengah, 2019

I Gdé Nyana Kesuma
magenah ring Br. Yéhtengah, Kelusa, Payangan, Gianyar, prasida kahubungin ring email: nyanakesuma10@yahoo.com.