Mulat Sarira tur Ngarastitiang Jagat

Olih: IDG Trinandita

Sumber Gagambaran; fineartamerica.com

Yén manah-manahin patut pisan napi sané kapiteketin olih panglingsir iraga sané nguni. Piteket piteket punika sinah melarapan sejarah utawi tatamian marupa cerita utawi satua, gegutitan, bacaan-bacaan sané madaging gagitan, gending, puisi, cakepan, miwah paplajahan kadarman sané lianan.

Sami tatamian punika dados titi pengancan anggén ngalanturang pamargi ring kauripan sakadi mangkin. Kauripan sané mangkin tur aab jagatelé sané mangkin sinah sampun kauningin sareng sami. Napi sané dumun rasaang mustahil sané mangkin sampun prasida wénten tur tragia. Yéning tlatarang indik kemajuan utawi perkembangan jaman sinah dados kasinahang luwih tur maju pesat. Téknologi sané sampun kamanggeh canggih punika taler perkembangan peradaban manusa sané nyarengin kemajuan téknologiné punika sinah nénten malih prasida kaboyanin. 

Sami sané mawasta kemajuan Ipték utawi Ilmu Pengetahuan lan Téknologi punika maimbas utawi maduwé pengaruh ting pola hidup miwah parikramané imanusa ring jagata puniki. Dumun informasi utawi berita méweh kapolihan yéning sané mangkin sakéng télevisi sampun 24 jam igup nénten wénten pegat-pegatnyané siarané. Punika taler dumun télpun arang wénten sané mangkin ring dija magenah télpun punika sampun kagemel sané mawasta HP. HP-né boya ja anggén nélpun manten, dados masi anggén internét sané dados anggén nonton yutubé miwah dados anggén ngawedalang pendapat utawi status léwat facebook, punika taler dados anggén mirengan radio, nonton TV miwah sané lianan. Cutetné guminé sampun di gemelané, punika anaké nyambatan yéning sampun makta HP android sané canggih punika.

Yéning tuturang HP canggih punika sané mangkin sampun kagamel olih anak sané kari alit utawi balita ngantos anak lingsir sami éksis. Punika taler HP sampun kabakta olih dagang kopi, dagang nasi, dagang bungkung ngantos dagang bé balung. Punika taler HP sampun kagamel olih dagang pindang, dagang canang tur dagang gedang. HP kabakta olih dagang tabia ngantos dagang sera. Yéning bos sinah sampun pastika makta HP minabté nénten asiki bisa-bisa lebih tekéning dadua utari lalima. 

HP puniki sané ngawinang berkomunikasi punika dangan. Napi sané dumun marasa ten mungkin sané mangkin sampun dados kenyataan. Uling HP bisa meadepan utawi madagang, uli HP bisa maan jodoh, uli HP bisa ngelah timpal, uli HP bisa maan pipis, ulian HP bisa hidupé boros. Ulian HP bisa kena uluk-uluk. Uliah HP bisa masuk penjara. Ulian HP bisa aluh ngalih gaé, muah sané tiosan.

Yén suba ngelah HP sinah ditu perlu ané madan pulsa. Yéning meli pulsa sinah perlu pipis nah ditu mulai pipisé majalan. Sinah nganggo HP perlu ada batesné. 

Yén cutetang makejang kemajuanné ento bisa berdampak positif bisa berdampak négatif. Ditu iraga harus dueg-dueg memanfaatkan utawi nganggon teknologi sané cangih ento. Pang tusing kena uluk-uluk. Pang sing kena pengaruh négatif. Pang tusing salah pergaulan. Pang sing salah pejalan idupé. Pang sing dampak ané négatif dogén bakatang. Sinah iraga patut malajah apang prasida teknologi ané canggih ento maguna tur ngawantu idup iraga apang idupé aluhan tur maguna boya ja idupé ulah aluh. Sané pinih penting ada dadua ané cutetang anggon ngadepin aab jagaté cara jani apang iraga terbebas tekéning sengkala ngarepin téknologi sané canggih. Élingan iraga mulat sarira utawi introspéksi diri mangda setata waspada tur éling ring ajah-ajah guru rupaka, guru pengajian miwah guru wisésa. Punika taler setata éling ring Sang Hyang Parama Kawi utawi Tuhan Yang Maha Ésa malarapan antuk srada bakti ngarastitiang jagat. 

Dumogi jagat lan sadagingnyané ngamolihan dirgahayu lan dirgayusa. 

I Déwa Gedé Trinandita
wantah makarya dados guru. Dané ngajahin ring Klungkung. Seneng nyurat saking SMA sané kaanggén ring mading miwah koléksi pribadi. Kakawiannyané naanin kawedar ring Bali Post wiadin Pos Bali.