Sinah sané Paling Luung

Olih: IDG Trinandita

Sumber Gagambaran; www.salamyogyakarta.com

“Sinah sané paling luung,” punika wantah murda utawi judul gaguat puniki, napi mawinan judulné sekadi asapunika titiang ngamanah nundunin kayun mangda kadaut ngawacén gaguat puniki.

Gaguat puniki wantah pinaka serana nyelehin rasa iraga ngaksi utawi mretyaksa pakibeh lan panglimbak sosial média (Médsos).

Yéning tlatarang ring dinané mangkin sinah méweh jagi ngaruruh jatmané sané nénten maduwé sosméd sané mawasta fésbuk, instagram, liné, bbm, Whatshap, tur sané lianan. Minabta yéning wénten sinah nénten makéh. 

Yéning turéksain ring jero soang-soang minabta saking anak alit, i mémé, i biang, i bapa, i aji ngantos i pekak, i kakyang sinah  sampun ngamiletin sosméd punika sané kacihnayang antuk HP sané kagamel.

Sosméd utawi Médsos sané kadruwénang soang-soang diri. Yéning uratiang irika sinah wénten foto utawi gambar diri soang-soang angga sang maduwé sosméd (fésbuk anggé pinaka conto) sinah jagi kacingak foto sané paling luung jagi kapasang kadadosang foto sampul utawi foto profil. 

Minaban titiang nénten wénten sané jagi masang foto sané paling jelék, yéning anak lanang sinah jagi masang foto sané sebengné paling bagus, sané istri sinah jagi masang foto sané kenyemné paling manis utawi papayasané paling jegég. Cutetné sinah sané paling luung sané jagi kaédéngan utawi kajantenang.

Napiké nika iwang, sapunika wénten patakén ring padéwékan, sinah nika mawali ring soang-soang angga. Kapertama yéning masang foto peragan sané pinih luung sinah punika wantah lumrah, mapan i manusa sami maduwé rasa angayubagia majeng padéwékanné punika mawinan i manusa  nyihnayang luung pakantenan déwék ipun.

Kaping kalih yéning wénten masang foto mapakurenan ring foto sampul médsos punika sinah pinaka cihna ipun sampun mapasangan utawi makurenan, niki manados cihna tresna ipun makurenan sané tan dados gugul utawi goda malih.

Kaping tiga yéning wénten masang foto anak lian ring médsos pinaka foto profil sinah punika wantah cihna ipun ten percaya tekén padéwékan utawi ipun nganggé idéntitas palsu, puniki patut yatnain.

Napi malih sané nganggén foto bunga, beburon, pemandangan lan sané lianan, pastika janten ipun sampun nénten nyihnayang padéwékan ipun. Yéning ring médsos kanikayang akun palsu pinaka akun sané nénten bertanggungjawab ring médsos.

Sakéwanten nénten ja samian sakadi asapunika, silih tunggil sinah wénten jatma sané maduwé manah lek utawi kimud nyantenang padéwékan boya ja ulian ipun mamanah jagi makarya akun palsu napi malih mapikayun nénten bertanggungjawab. Sakéwanten ipun tetep nyarengin médsos pinaka genah ngaruruh gatra lan pangweruh lianan

Patut kauningin sakadi puniki, yéning ring basa Indonésia secara umum médsos adalah sebuah média onliné, dimana para penggunanya bisa saling berkomunikasi dan  berinteraksi melalui jaringan internét, meréka bisa mengirim pesan, sharing, hingga membangun jaringan sendiri (networking).

Yéning basa baliang kirang langkung artosné médsos punika wantah serana onliné utawi digital sané ngawinang iraga bisa ngorta lan masadu ajeng ngangé jaringan internét, ngawinang bisa ngirim pesen, magendu wirasa ngantos ngaryanang grup anggé serana paswitran.

Lisa Buyer nelatarang média sosial wantah pinaka serana masyarakat sané pinih terbuka, ngulangunin lan interaktif ring aab jagaté mangkin. Puniki janten pisan mapan médsos punika sakadi candu sané setata karuruh tur kaanggé bersosialisasi utawi nyihnayang padéwékan, ring sapantaraning parikrama warginé.

Wénten ciri-ciri médsos sakadi partisipasi artos ipun ring médsos sakadi fésbuk wénten sarana liké (seneng), koméntar, sharé lan sané lian. Sané ngawinang iraga bisa nyenengin lan ngamargiang sané kasenengin punika.

Wénten taler katlatarang indik ciri-ciri médsos, kapertama keterbukaan sané pinaka ciri iraga dados nyihnayang   padéwékan ring sakancan parikrama sané jagi kaunggah, kaping kalih perbincangan artos ipun sané ngawinang ring fésbuk iraga dados ngorta magendurasa tur mabligbagan. Kaping untat ciri keterhubungan artosnyané médsos punika mrasidayang ngaryanang hubungan pantaraning soang-soang angga malarapan kontén tautan utawi link sané maartos ubungan.

Sané mangkin  sasampuné miragi indiké ring ajeng minabta boya ja ring foto profil manten warginé jagi masang foto sané paling luung, akéh taler sané setata ngunggah sakancan parikrama sané kakaryanin, sakadi foto sélfi, foto risedek magarapan lan sané lianan. Yéning petékin awainé bisa ngantos ping solas ngaploud foto kaunggahang ring fésbuk.

Sangkanin manados média sosial indiké punika sakadi nénten mapisalah sakémawon yéning sampun berlebihan utawi muduhin utawi katagihan irika wau dados pikobet. Pikobet sané bisa ngawinan sebet utawi sungsut ulian biyut ngantos uyut ring kulawarga. 

Sané mangkin ngiring turéksain akun druwéné soang-soang napiké profil lan sampul duwéné ring fésbuk sampun madaging foto. Yéning sampun sinah sané paling luung jagi kagenahang irika. Punika taler sakancan parikrama duwéné ring médsos jeg sinah sampun sané paling luung jagi kaunggah.

Yéning sampun jakti-jakti punika sané nyantenang padéwékan sinah nika wantah becik, sakémawon élingan akun punika kawigunayang sakadi patut sumangdané sané becik dados kaanggé nabdabin kahuripan puniki antuk informasi, pangeweruh sané dahat maguna nagingin kahuripan lan sané nénten becik prasida kasomia. Astungkara.

Buda, 31 Méi 2018

I Déwa Gedé Trinandita
wantah makarya dados guru. Dané ngajahin ring Klungkung. Seneng nyurat saking SMA sané kaanggén ring mading miwah koléksi pribadi. Kakawiannyané naanin kawedar ring Bali Post wiadin Pos Bali.