Puisi-puisi Ni Nyoman Tisna Wati; Téja Dharmaning Kauripan

Potrekan I Nyoman Mahayasa

Téja Dharmaning Kauripan

Nguripang taksu

Masarana bhakti tuhu

Swadharma sentana

Ngupapira swagina

Gaguat kagamel ring kara 

Idep karajah tatwajnana

Ngutpeti sahananing mautama

Yasa kérthi ring Hyang Pitara

Téja dharmaning kauripan

Upapira kantos riwekasan

Uripang ring angga sarira

Mangda sida ngebekin bhuana

Cayané sané galang kalungsur 

Mangda panggih marginé kapungkur

Téja tatamian kawitan nguni

Sumpangang ring tungtunging ati

Prapén

Uripang téjané

Mangda nglejeg tajeg cayané

Basmi sahananing leteh urip puniki

Pasupati ring angga mangda metu jati

Uripang antuk japa lan mantra

Entegang mangda tegteg setata

Endihang raris tigtigin tan mari

Mangda marawat warni Widhi saking sunaran gni

Tan sida kaonang globalisasi

Caya téja tatamian saking nguni

Gamel ring kara linggihang ring siwadwara

Cihna dharma kauripan swakarya

Sentana ugi miara

Cihna bhakti ring Hyang Pitara

Setata uripang ring swadharma 

Sida nunggal téja sarira lan téja bhuana

Ni Nyoman Tisna Wati
sisia kelas 12 ring SMK Negeri 1 Abang. Polih jayanti 1 ring pacentokan puisi PKB kaping 40 warsa 2018.