Puisi-puisi I Gdé Nyana Kesuma; Suluh Kali Uga

Gagambaran Olih I Nyoman Buda Arimbawa

Pidan Jani

Ulah égar

Batisé matindakan

Sahasa kuangan daya

Buka jukut kuangan uyah

Nyem létég rasané

            Kéto parisolah kadi mangkin

            Joh mabinayan tekening i pidan

            Jani suba dueg

            Suba bang aluh

            Kéwala anggo melog-melog timpal

Pidan belog kaorahang

Tusing ja saja

Diapin belog nanging bisa ngéka daya

Tiing angsud kanti lanying

Satmaka sanjata maperang

Maperang nglawan I Penjajah

Sané masanjata bedil

Raket rumaket dados asiki

Tan wénten pabinayan

Punika sané ngawé melah

Égar bayuné nglawan

Nglawan kanti ngetélang rah

Tan ja ngawé makirig

Yan satondén mati

Mélanin gumi

Apang sida mahardika

Barak lan Putih

Warna

Anak liu ada warna

Ada kuning

Ada selem

Ada gadang

            Kéto masih ada warna tangi

            Warna pelung

            Lan ada warna utsaha luih

            Sakéwala da pesan ento kaengsapang

            I raga ngelah warna sané macihna

Nyihnayang gumi nusantarané

Ada warna barak

Ada warna putih

Barak panuntun pamargi

Putih panuntun manah

            Bani madasar manah tulus suci

            Ento ané nyikiang nusantarané

            Ento cihna bukti

            Pamargi para kusuma bangsané i malu

            Kantos jani suba pitung dasa dua tiban

Tusing ngerambang cenik kelih

Tua bajang

I raga tetep barak lan putih

Yadiastun joh paek

Tusing nolih ras ajak suku

Indonésia mahardika

Bhinéka tunggal ika

Setata kaélingang nyabran warsa

Makacihna bhakti

Tekéning para kusuma bangsané

Mahardika

Mahardika

Indonésia mahardika

Kadi macan ngalulung

Macaling rénggah

Medal geni saking bongkol lidahnyané

            Geni pinaka cihna

            Jengah bayuné majajah

            Tan sida ngwetuang parikrama

Kadi mategul tan patali

Ring genah sané madurgama

Genah sané suci

Druwén i raga sareng sami

Nanging tan sida makingkin

Kadi langit kasaputin gulem

Peteng dedet tan mari nepuk galang

            Sakéwanten makacihna utsaha

Setata nglawan I Penjajah

Belanda teka lawan

Mabéla pati

Ngantos Nipon sané nimpalin

Tan surud mautsha

Nyikiang kayun dados asiki

Mangda sida mahardika

Mahardika

Mangda sida mangkingkin

Ngawé cihna nusantarané

            Sané kabaos macan ring Asia

            Nglulung nyihnayang mahardika

            Indonésia mahardika

            Indonésia mahardika

Punika pamargi nusantarané

Kadi kayu mentik saking batunyané

Uli cenik kanti kelih

Sané mangkin patut kaupapira

Sampunan ngawé tan becik ring jagat

Urin Bhuana

Kangin kauh

Kaja kelod

Batisé matindakan manyelémpoh

Inguh paling ring manah

Joh paliatné tan keni antuk maosang

            Sahasa ilang urip

            Tan sida manahé ngatonang

            Pamargi para lelingisiré i malu

            Mautsaha ngantos mabéla pati

            Mangda jagaté mahardika

Warna barak lan putih

Pinaka lambang nusantarané

Yéning kanirgamayang

Warna putih tenget ring ati

Warna barak pinaka bekel mamargi

            Matangi saking sirep

Ngamuk i musuh ring angga sarira

Nyujuh kasukertan ring jagat

Ngambel urip ring tangan

Tekek mamargi mapekeling

Punika cihna nusantarané

Satmaka urip bhuana

Mautsaha madasar manah tulus suci

Kasarengin parilaksana sané subhakti

Mangawé jagaté kerta rahayu

Suluh Kali Uga

Indonésia

Mahardika

Tusing ja cara lalah tabia

Ento sida ulian mautasaha

Mabéla pati mawit ring angga

            Indonésia

            Mahardika

            Ulian lelingisiré waged ngéka daya

            Tumbak pinaka sanjata

            Pejah ring ranggana

Indonésia

Mahardika

Tusing ja ada binané

Cenik, kelih, bajang, truna

Nyikiang raga mélanin negara

            Mahardika

            Mangkin patut kaupapira

            Mawit éling ring budaya

            Basa, aksara miwah sastra

            Sané dados akah budaya

Pinaka dasar ring angga

Mangda sida kadi tapak dara

Tusing ada bina pada

Ento dasar sané utama

Cihna mahardika ring kali yuga