Puisi-puisi I Madé Suarsa; Maceki lan Maca Kidung


Pancasila lan Panca Sila

Beda agama
Tan ngrabéda manyama
Tios adat
Paras paros tan pegat
Budaya tan pateh
Tan kekeh pabeneh
Lian basa
Sa bangsa
Gingsal soroh
Gingsih pikenoh
Katah pamatut
Sami asah anut
Anéka kulit
Makanti tan sulit
Bina ika tunggal ika
Tan hana Indonesia mangrwa
Sami karasuk pancasila
Sampunang karusak panca sila


Maceki lan Maca Kidung

Maceki…
Matajen sawai makeles kantos kaki-kaki
Judi yéki
Ngardi pikayunan daki
Manyama braya sai béki
Benyah arabi laki
Baya sidi tan siki
Mriki mataki-taki
Maca kidung
Sekar alit sekar agung
Pucung
Widara gumulung
Ngacep ang mang ung
Sang hyang wisésa asung
Manyama braya adung
Sabayantaka salunglung
Budidaya adiluhung
Jagadhita sarwapranihita pulung.


Bollywood lan Baliwood

Hollywood
Genah luh-luh luah

Dollywood
Genah luh-luh lulu

Bollywood
Genah luh-luh galuh

Baliwood
Genah luh-luh luih


Nusantara lan Sunantara

Magenah ring katulistiwa
Nusantara mandala
Sarahina katibénin sinar surya
Utarayana utawi daksinayana
Hyang candra wintang biomantara
Pretiwi bayu apah teja akasa
Bukit gunung wrekodara makemit waluya
Alas tukad danu segara
Setata sayaga tan nunén prayatna
Sami sama niwakang rengreng lahru masa
Diingin opek sanusa pada
Makulit sawo si parajana
Élah ngaruruh pangupa jiwa
Tusta déwati déwata nyambehang mreta
Yan utsaha ta larapana
Akéh wong sunantara
Mangupa jiwa malila cita


I Madé Suarsa
embas ring Banjar Gelulung, Désa Sukawati, Kecamatan Sukawati, Kabupatén Gianyar, 15 Méi 1954. Dané wantah oka saking pangawi sastra Bali modéren I Madé Sanggra (almarhum), putra kaping kalih saking pitung raka rai. Dané ngamolihang rancagé ping kalih, inggih punika ring warsa 2005 antuk pupulan puisi “Ang Ah lan Ah Ang”, lan warsa 2007 antuk pupulan puisi “Gdé Ombak Gdé Angin”.

No comments