Céngcéng Makemong
Olih:
I Gusti Lanang Sutéja Naréndra
 |
| Gagambaran Olih A. Van Pers |
Céngcéngé iri tekén gongé.
"Élah pesan gaén gongé. Awaké iceh ngilit gending, kanti kebés rasanv
bunguté mantepang, ia jeg pragat mamunyi cepok cepok. Njirrrrr.... suud monto.
Icang bisa kéto!" Kéto ia ngraos tekén kendangé. I Kendang nyautin sambil
glalak glilik.
"Ae, icang ngelah masé keneh
kéto. Tegarang kenehin, ia mamunyi kapah-kapah, nanging paling nuyuhin. Negen
gong jak dadua, nepekin aukud. Tatelu ia ngayahin. Lén waké, kalud jité
matepak, misi gidaté magetokin. Diastun ngisi tanjek gending tusing ajum buka
kéto!"
Béh, Sulingé milu protés.
"Sing ada jelékan tekén nasib icangé. Bungut icangé sepsepa, songé tekepa.
Nuju ané ngupin ngeroko, bekbekan icang! Jeg setata malomod misi poos. Kéwala
sing ja maayahin buka gongé. Nuju nongos ia mapanggung, yén majalan ia
matenggong! Icang jeg celekanga di siksikané!"
Buka senggaké, apiné ancungin somi,
nyansan makerig. Sayan liu reramon gamelané protés tekén gongé.
"Baong icangé cekuka, basangé
koroda. Nyén ada sakitan tekén icang?" Kéto raos Rebabé.
"Mbééh... mara amun to. Néh
dadi icang. Nyén kodag tendasé magetok salantang gending? Kanti ngelaut
mabencol tendas icangé!" Saut I Terompong sedih sambil ngusuhin sirahné
mabencol.
Béh, suba gila geting mirib ajaka
makejang tekén gongé. Ento mawanan dugas kupahan nabuh, gongé sing ajaka.
Lantas makejang masilur ageman. Céngcéngé makemong, kendangé nyuling, rebabé
nerompong, terompongé nyemak gagamel gongé.
Nah, kenehang suba ditu kénkén ya
dadiné! (*)
No comments