Nyobak Aplikasi id.testony.com
Olih:
I Gedé Putra Ariawan
 |
| Gagambaran Olih I Gede Putra Ariawan |
Ulian kecanduan pésbuk, Prof
Sukak-Sukak, ahli bahasa ané peningalané kanti bédbéd ngulik buku sebilang wai,
dadi apdit ngajak info ané ada di pésbuk. Makejang informasi ané paling baru
pasti tawanga. Patuh cara ané jani, rikala ada aplikasi id.testony.com mabasa
Bali, ia masi milu magirang-girangan nyobak aplikasiné totonan. Sujatiné,
simaluné ia tusing dot nyobak aplikasiné totonan, krana ia nganggep ento biasa
dogén. Sakéwala dugasé ada berita héboh indik somasi ulian aplikasiné totonan
nganggon basa Bali ané porno, lan cabul, ia dot masi milu nyobak aplikasiné
totonan. Apang nawang koné apa ya ané lakar pesu yén ia nyobakin aplikasiné
totonan. Buina uling pesu somasiné totonan, nyansan liu anaké ané nganggon
aplikasiné. Kanti bek maseksek di berandané anaké ngesér. Kéné silih sinunggilné
ané tepukina tekén ia di berandané:
Apa ané ngaénang ci
iriang pisaga?
Ulian Goban Ciné Bagus
Ulian nepuk to, jeg demen atiné krana
ia marasa déwékné bagus. Ia makeneh, yén ia nyobak aplikasiné totonan, pasti
pesaut aplikasiné totonan: ulian goban ciné bagus.
Ngénggalang lantas ia mukak
aplikasiné totonan. Nanging kanti mekelo enggang ngep ia ngantiang apang
aplikasiné totonan mebukakan, jeg sing nyak-nyak mebukakan. Kanti ada mirib
tengan jam ngantiang nanging tusing masi nyak mebukakan. Iseng lantas ia ngecék
pakétan.
“Tain méng, pakétan awaké telah,
pantesan sing nyak mebukakan.”
Kurenané ané sedek jumprat-jumprit
tunggang-tungging di malun mekané lantas kaukina.
“Man, beliang malu awaké pakétan.
Pakétan awaké telah!”
“Cang nu sibuk bli?”
“Sibuk ngujang?”
“Né bibih cangé mara asibak misi énci.”
“Penting né!”
“Né lebih penting buin bli.”
“Mani sing keajak ka salon buin
nyai.”
“Mih, nah bli antiang bin akorésan
gén, apang bek bibih cangé misi énci.”
“Énggalin! Penting gati né.”
Suud ménci, kurenané Prof Sukak Sukak,
ngénggalang melaib cara dolong ka warung dajan umahné lakar meli pakétan.
Telulittttt.... Kéto munyin HPné
Prof Sukak Sukak ulian pakétané suba macelep. Ngénggalang ia tétering data ka léptopné
tur mukak pésbuk lan mukak aplikasi id.testony.com totonan.
Mara mukak aplikasiné totonan,
sedeng melaha ia nepukin tulisan:
Apa ané ngeranaang ci
liu ngelah musuh??
Langsung ia ngeklik tulisané
totonan sambilanga mekeneh, “pasti jawabané: ulian goban ciné bagus.”
Disubané loding kuang lebih molas
menit, ulian di jumahné Prof Sukak Sukak sinyalé cenik, nyidaang masi aplikasiné
totonan mebukakan lan maang jawaban. Nanging tengkejut ia disubané maca jawaban
aplikasiné totonan. Jawabané sing lén tuah:
Sombong! Mrekak, lebian
éksien di médsos, bungut ci bujuh maka perlu disomasi
“Teras keleng!!!! Bungut awaké
nagih disomasi!!!” kéto ia mamunyi sambilanga mantigang léptop.
Buléléng, 13 Juli 2017
No comments