Galungan Ping 1.135; Sampunké Dharmané Sida Ngasorang Adharmané?

Olih: Ngakan Madé Kasub Sidan

Keasrian jagat Baliné nemonin Galungan yukti tan wénten samén pada. Penjor majéjér kajangkepin makudang-kudang payasan katon asri gumanti sida nutdut kayun. Lanang istri mabusana adat lan alit-alit mabusana sarwa bungah nyihnayang pakayunannyané taler bungah égar.

Nemonin Buda Kliwon Wuku Dunggulan, pinanggal 5 April warsa 2017 puniki, wantah Galungan sané rauh kaping 1.135. Kruna Galungan wit saking basa Jawa Kuna sané mateges ”menang” utawi ”maperang” pateh taler kruna Dunggulan sané mateges ”menang”. Sangkan punika olih umat Hindu Galungan kabawos rahina kamolihang (kamenangan) Dharma (kapatutan) kawonang Adharma (tan patut utawi kamomo angkaraan). Raris ring manah wénten pitakén napi sané kabawos dharma lan napi adharma? Sapasira sané kasengguh dharma lan sapasira taler sané kasengguh adharma. Kawiyaktiannyané dharma punika pikenohnyané wantah nunggilang jiwa pramana antuk pikayun ning. Matunggilan jiwa lan pikayun ning puniki wantah sekala dharma ring padéwékan iraga. Pikayun sané ruwet byahparaning idep punika wantah sané matemahan adharma.

Éédan Galungan-Kuningan

Mangda sida ngardi lan ngamolihang dharma wénten makudang-kudang éédan sané patut laksanayang sadurung lan sesampuné Galungan. Sedurung Galungan wénten mawasta Sugihan Jawa dan Sugihan Bali. Kruna Jawa iriki pateh kadi Jaba, artin ipun ring sisi. Sugihan Jawa pikenohnyané wantah nyuciang bhuana agung (jagat) sané wénten ring sisi manusa. Sugihan Jawa kalaksanayang ring rahina Wraspati Wagé Wuku Sungsang, nem rahina sadurung Galungan. Ring lontar Sundarigama kabawosang rahina Sugihan Jawa inucap wantah panyucian Dewa Kalinggania Pamrastista Batara Kabeh (Penyucian Dewa, penyucian Bhatara sami). Pamargin upacara malarapan antuk mersihang sekancan genah lan prabot upacara ring suang-suang genah suci.

Arahina sesampun Sugihan Jawa, nemonin Sukra Kliwon Wuku Sungsang kawastanin Sugihan Bali: Kalinggania Amretista Raga Tawulan, tetuwekné wantah nyuciang bhuwana alit (raga suang-suang), malarapan pikayun sané ning, neng lan matirta gocara. Ring Redité Paing Wuku Dungulan kabawos Panyekeban . Ring rahina puniki Sang Kala Tiga Wisésa tedun gulgul manusa. Mawastu ring rahinané punika iraga sami mangda sida ”anyekung jñana” artin ipun: negdegang utawi nunggilang pikayun mangda ten sida kagoda olih Butha Galungan. Ring lontar punika taler kaunggahang nirmalakena (sapa sira wong sané pikayunnyané setata suci) ten pacang sida kagulgul olih Butha Galungan. Bénjangnyanée ring Soma Pon Dungulan kawastanin Penyajaan. Ring rahina punika iraga mangda tetep nyuciang raga bilih-bilih sida nincapang pikayun ayu malarapan yoga semadi.

Selanturnyané ring Anggara Wagé Dungulan kawastanin Penampahan , yuktin ipun wantah ngamargiang bhuta yadnya ring catuspata utawi ring lebuh natah umah, mangda Sang Kala Tiga Wisésa nénten sida ngulgul iraga. Benjangnyané ring Buda Kliwon Dungulan sané kawastanin rahinan ageng Galungan, iraga sané maagama Hindu, ngamagiang astiti bhakti ring Ida Sanghyang Widhi Waca manut prabawa Ida. Wrespati Umanis Dungulan sané ketah kawastanin Manis Galungan, iraga sareng sami éling lan mulat sarira antuk pamarginé nem sasih tur kalanturang ngamargiang sima krama, nunas mangampura majalaran saling rauhin ka umah suang-suang. Selanturnyané ring Saniscara Pon Dungulan sané kawastanin Pamaridan Guru, wantah galah ngalaksanayang tirta gocara. Benjangnée ring Redité Wagé Kuningan sané kawastanin Ulihan, rahina sawatek Déwa Pitara mewali ka kahyangan.

Selanturnyané Soma Kliwon Kuningan kawastanin Pemacekan Agung, Déwa Pitara mawali malih ka genah suang-suang. Ring Sukra Wagé Kuningan, mawasta Penampahan Kuningan galah nyayagang nyanggra Kuningan. Arahina sesampuné penampahan Kuningan, duk Saniscara Kliwon Kuningan, kawastanin rahinan ageng Kuningan. Ring galah puniki raga sami teleb ngaturang bakti ring Ida Sanghyang Widhi Waca manut prabawa Ida. Upakara mangda kamargiang sadurung nincap tengai tepet, sahantukan manut pitutur panglingsir ngawit nguni, para Dewa, Bhatara kairing olih para Pitara wantah tedun ngantos sadurung tengai tepet. Ring tengai tepet Ida sampun mewali malih ka swarga.

Sesajén ring rahinan Kuningan: ring palinggih utama inggih punika tébog, canang meraka, pasucian, canang burat wangi. Ring palinggih sané alitan katur nasi selangi, canang meraka, pasucian, dan canang burat wangi. Ring kamar suci, ngaturang pengambéyan, dapetan madaging nasi kuning, ulam sajangkepné. Ring wewangunan sami (pelangkiran) kadagingin gantung-gantungan, endongan, tamiang, lan kolem. Endongan pinaka simbol aturan ring Hyang Widhi. Tamyang pinaka simbol panolak malabaya. Kolem pinaka simbol genah malingih Hyang Widhi, para Dewa lan leluhur. Suang-suang paumahan makarya dapetan, madaging sesayut prayascita luwih nasi kuning lan ulam bébék utawi ayam. Tébog madaging nasi kuning maulam ulam segara, adéng dadar, lan wayang-wayangan mawit saking daun timun. Tébog punika nganggée tatakan taledan sané madaging tipat nasi kekalih, sampiannyané kepet-kepetan. Yaning ten polih tébog, kangkat kagentosin antuk piring.

Ring Buda Kliwon Pahang sané kawastanin pegat uwakan, pinaka pewarah Dewi Durga mantuk ring Sri Jaya Kasunu sané kacihnayang pamargin ngabut penjor raris kageseng, abunnyané kagenahang ring kelapa bungkak gading tur ketanem ring pekarangan suang-suang. Wewantenan sané katurang ring pegat uwakan sesayut dirgayusa, panyeneng, tatebus mantuk ring Ida Sanghyang Widhi. Pegat uwakan wantah galah pinih ungkur ngamargiang éédan Galungan-Kuningan selami asasih pitung rahina ( 42 rahina) mawit saking Sugimanek Jawa.

Pénjor cecirén Galungan

Ngalaksanayang upakara ring éédan Galungan tan sida pasah ring kawéntenan pénjor. Pénjor pinaka sinalih tunggil srana upakara ring Galungan, tan lian wantah simbol naga basuki. Naga Basukih tetuwekné wantah cihna lohjinawi gemah ripah tata tentrem kerta raharja. Sangkan punika srana makarya penjor mawit saking pikolih ring sawah, minakadi plawa (daun-daunan), palawija (biji-bijian: padi, jagung), pala bungkah (umbi-umbian), lan pala gantung (kelapa, pisang, timun).

Kawéntenan srana penjor punika pastika maduwé tetuwek ageng. Manut daging lontar Tutur Dewi Tapini, sané ngindikang kadi ring sor:

“Ndah Ta Kita Sang Sujana Sujani, Sira Umara Yadnva, Wruha Kiteng Rumuhun, Rikedaden Dewa, Bhuta Umungguhi Ritekapi Yadnya, Dewa Mekabehan Menadya Saraning Jagat Apang Saking Dewa Mantuk Ring Widhi, Widhi Widana Ngaran Apan Sang Hyang Tri Purusa Meraga Sedaging Jagat Rat, Bhuwana Kabeh, Hyang Siwa Meraga Candra, Hyang Sadha Siwa Meraga “Windhune”, Sang Hyang Parama Siwa Nadha”

Kirang langkung artin ipun : Uduh sang wijaksana, sané ngamargiangn yadnya, mangda sareng sami uning ring tata titi ngulati kadéwataan, sangkan punika sang Bhuta manadi genah/tatakan/dasar yadnya punika, raris Déwa samudya manadi intisari bhuwana agung, mangda saking Déwa sami mawali ring Ida Sanghyang Widhi. Widhi widhana, tetuweknyané mangda sang Tri Purusa sida pinaka daging bhuawana agung, Hyang Siwa manadi Bulan, Hyang Sadha Siwa manadi windu (titik O), Sanghyang Parama Siwa manadi nadha (kecek), yan tunggilang sami pinaka simbol Ong Kara.

“Sang Hyang Iswara maraga Martha Upaboga, Hyang Wisnu maraga Sarwapala (buah-buahan), Hyang Brahma maraga Sarwa Sesanganan (bambu lan sanganan), Hyang Rudra maraga Kelapa, Hyang Mahadewa maraga Ruaning Gading ( janur kuning), Hyang Sangkara maraga Phalem (buah pala), Hyang Sri Dewi maraga Pari (padi), Hyang Sambu maraga Isepan (tebu), Hyang Mahesora maraga Biting (semat).”

Saking lontar punika, srana makarya pénjor :

Bambu

Plawa (dedaunan)

Palawija (biji-bijian minakadi padi lan jagung)

Palabungkah (umbi-umbian)

Palagantung (kelapa, pisang, timun)

Sanganan (Jaja-jaja)

Uang képéng 11

Sanggar Ardha Candra simbol Ong Kara.

Sampian pénjor sanée madaging porosan (mako, basé, apuh, buah, gambir) lan sekar.

Tetuwek Galungan

Yaning telehing gumantin ipun Galungan wantah pamargin krama sané maagama Hindu sida nelehin pamargin sané kabawos adharma lan budhi atma (dharma = kapatutan) ring angga sarira suang-suang. Rumasa bagia sida kapangguh yaning iraga sida memargi ring margi dharma. Yaning ring upacara, wantah galah krama Hindu setata éling ring spiritual lan ritual mangda sida ngasorang adharma lan ngajegang dharma mawit saking diri suang-suang. Tetuweknyané Galungan wantah srana nunggilang dharma ring pikayun, mawastu iraga sami molihang pikayun ning, maka dasar ngametuang bebawos lan laksana becik, pinaka lingga dharma ring angga sarira.

Raris sané mangkin wénten, pitakén, “Sampunké Dharma sida ngasorang Adharma né?” Panyawisné wantah mawali ring iraga suang-suang. Dumogi !