Wayang

Olih: Ida Bagus Gdé Parwita

"Dharmaswami" Gagambaran Ketut Madra

Wenginé awor ring sunaran langité

ngaléncok ngukuhang akasa miwah pertiwiné

mancut kayuné uleng nincapang pemargi

ngurip sahananing wisésa antuk tatwa waskita

minab sang wiku utawi sang ksatria sané kauduhang rawuh

ngasorang meseh manut wilangannyané.

Urip jagaté wantah suryané nyunarin

nabdab rahina miwah wengi nututin carita

sang dalang nagingin antuk gagonjak miwah pitutur

kabawos tresna katuwut sareng sami

anggé pamucuk kala ngamarginin pati uripé

pradé sampun jangkep wilangané

rawuh pangrubédané

macampuh tungkas kayuné

nulak tatujon.

Wisésané sangkaning kukuh

ngukuhang patinget antuk pituduh dalang

gagendéran ngarumrum sang sedek lali ring pengapti

antuk sasolahan jagaté negul wenginé

ngeseng antuk panah wisésa

keliré putih sami kalikub rah

segarané osah ngedohang kelaib

katibakin caciri nungkulang para ratu

pamuwus muputang

ngutang sané kawon antuk tangis

miwah suryak lan pakrimik

sadurung aripé puput rawuh ring kayun.