Pokémon
Olih:I Gedé Putra Ariawan
 |
| Pokemon Go |
Sasukat
gamé anyar munggah di internét,
cerik-ceriké tusing sinah muncuk cunguhné. Dija-dija ngindeng ngaba HP.
Makejang ngaku-ngaku sibuk, jelékan tekén mandor proyék bangunan ané menang
ténder miliaran rupiah.
Sambilang
majalan ngecek HP, malaib mesuang HP, medaar namping HP, mablanja, masepéda,
manjus, mabakti, kanti makoratan sing buunganga ngecek HP. Dija ja nengil
pastika ngecek HP. Di jumah, di warung, di paon, di balé banjar, di pos
kamling, di jalan-jalan, di teba, di tukadé setata ngecek HP. Tusing
wadih-wadih nepukin HP.
“Ngudiang
ditu?”
“Ngejuk
Pokémon!”
***
Nuju
liburan, cerik-ceriké dini mapunduh dadi
besik. Di tongosé jani, ramé san pidan cerik-ceriké malayangan. Uli ba dangin
neked ba dauh, cerik, kelih, tua, bajang makejang teka mai. Mapupul, mabaris di
pundukanné saling pagedénin bayu lakar menékang layangan.
“Tarik!”
Bendera
putihé ba dauh suba menék. Ento
panginget, ada angin baret lakar menékang layangan. Sekeha raré angoné suba
sayaga, limané jani tekek ngisi taliné apang tusing paida. Makejang masuryak,
lantas malaib pagedénin bayu menékang layangan. Ada ané slimputan batisné
ngelidin tain sampi di pundukanné. Ada masi pegat sandalné ulian bakat jekjeka
ngajak timpalné. Sekeha layanganné girang.
Pakedék pakenyung.
Sang
Hyang Bayu ngeberang layanganné. Tegeh ngambun kanti marasa milu awaké makeber
nyelusup ka tengah ambuné. Né madan Janggan. Layangan tradisional Bali ané
ikuhné lantang cara naga Basuki. Mawarna Tri Datu: putih, barak, lan selem.
Layanganné jani ngias langit, mawarna-warni.
Carita
layangan Janggan ané ikuhné dawa ento tuah cerita pidan-pidan. Kéweh san jani
nepukin cerik-ceriké malayangan. Dini, sig tongos Dadong Blenjuh negak, sekeha
layanganné pidan sesai mapunduh. Di rompyok maukuran 3x3 méter, ada warung bedég
di sisin cariké. Merab terpal, tongos Dadong Blenjuh madagang.
Punyan
kacangé mentik, sinah melejit uli selagan padangé. Donné lumlum ngaé bungah
keneh anaké nepukin. Sakadi lapangan bola di Senayan Jakata, tongosé dini
linggah. Uli joh, masliaban gadang paningalané, cara ada anaké ngebatin karpét.
Uli ba dangin neked ba dauh, punyan kacangé ngebekin abian. Ambenganné mentik
di selagan abianné. Tumbén jani nepukin cariké makenyem. Ada balang kecas-kecos di pundukanné.
Pidan
nuju masan layangan, cariké dini benyah latig. Tusing taén nepukin padangé
embeg cara kéné. Punyan kacangé sing taén mabuah. Cariké pidan ngeling,
sewai-wai kajekjek batis sekeha layanganné. Diastun cariké linggah tusing
ngasilin apa, ané ngelahang tusing ja pedih. Ulian benyah latig suba ngidang
nekaang hasil.
“Kopi,
kopi, kopi!”
Kéto
pidan, Dadong Blenjuh ngaukin sekeha layangané apanga teka mablanja. Uli badauh
tanglus san madingehan di kupingé. Anak lingsir mawak gilik suba sayaga di
warung rompyok ngadep daganganné. Dadong Blenjuh tusing ja gedeg nepukin
carikné anggona tongos malayangan. Ia tusing ja pedih nepukin abian ané mara
pulana ibi kajekjek, kaingsek kanti layu.
Gedeg
basangné suba ilang ulian nepukin bati. Cerik, kelih, tua, bajang dadi besik teka mablanja. Dadong Blenjuh
girang. Paningalanné gadang nepukin pipis. Daganganné lais maseluk.
“Kopi
besik Dong!”
“És
besik Dong!”
“Tipat
cantok besik, énggalin Dong!”
“Rujak
sik Dong!”
Dadong
Blenjuh paling ngayahin anaké mablanja. Warung rompyok di sisin cariké ramé
nekang hasil. Batin daganganné mapupul sakabedik kanti i Dadong ngelah
déposito. Ada limang tiban, sasukat Dadong Blenjuh kalahin kurenan, ia ngidupin
awakné padidi. Pianak lan cucuné merantau ka luar Bali. Makejang suba suksés.
Diastun sabilang bulan kirimina pipis, ento
boya alasan Dadong Blenjuh santé sing nyemak gagaén apa. Uli cerik ia demen
medagang, kanti tua mabo tanah awakné enu masi demen madagang. Lamun pidan matanja di peken,
kanggoanga jani mukak rompyok di sisin cariké. Tis anginé ngesirsir uli semengan
neked sanja. Dadong Blenjuh seleg ngayahin cerik-ceriké mablanja.
Né
carik paling linggah di désa, Dadong Blenjuh ngelahang. Ada tenga héktar
linggahné. Tusing pulanina apa. Nuju seger bayuné, mara tanemina kacang,
kaséla, lan jagung. Ento masi tusing nekaang hasil. Sesaian abianné mati. Uyaka
tekén cerik-ceriké anggona tongos maplalianan. Apa buin masan layangan cara
jani, abianné layu ngemasin mati. Punyan kacangé sing nyak mabuah ulian sesai
bakat jekjeka tekén sekeha layanganné.
“Dong
Blenjuh!”
Nang
Lodri ngaukin uli ba dauh. Pajalanné ingkik-ingkik nyuun padang a kampil.
Tepukina Dadong Blenjuh bengong padidina. Warungné sepi. Tusing ada anaké
mablanja.
“Mai
singgah ngopi,” saut Dong Blenjuh.
“Nah
binsep, icang kal nitip padang dini!”
Nang
Lodri lantas nitipang padangné. Ia mula sasai ngarit di carik Dadong Blenjuh.
Tumbén jani ngarit kanti bek isin kampilné. Biasané misi tenga suba aget. Ento
suba milih-milihin ulian kéweh san ngalih padang. Sampiné tusing nyak ngamah
padang awagan. Né jani liang san kenehné nepukin padangé mentik ngebekin
abiané.
“Buin
ngarit?”
“Buin!”
Nang Lodri gencang nyautin. Kaliwat liang atinné nepukin cariké masluét gadang.
Dot asané Nang Lodri sawai-wai dini,
lemah peteng ngaritin padangé kanti telah. Apang tusing énggalan
jekjeka. Dini, sig tongosé jani padangé sesai layu. Ngemasin mati, uyak sekeha
layangan.
Keneh
Nang Lodri malénan tekén Dadong Blenjuh. Dadong Blenjuh makita cara pidan.
Diastun abian kacangné benyah, ulian
ento ngidang munduhang bekel. Warungné ramé nekang pipis. Anggona meli pulsa
nuju nélpon cucu-cucuné di luar Bali. Sisané tabunganga, apanga bek ngelah
déposito.
“Dija
lakuna cerik-ceriké jani?”
Dadong
Blenjuh ngamikmik padidina. Kanti sanja, tusing ada cerik-ceriké teka mablanja.
És rujak di tengah termosé makiré dadi yéh. Cerik-ceriké tusing ada malayangan.
Dadong Blenjuh pepes rugi. Sesaian cerik-ceriké jani tepukina ngaba HP. Di
jumah, di warung, di paon, di balé banjar, di pos kamling, di jalan-jalan, di
teba, di tukadé setata ngecek HP. Makejang ngaku-ngaku sibuk. Sibuk ngejuk
Pokémon.
“Pokémon?
Éngkén gobané?
Dadong
Blenjuh tusing karesep ningeh satua cerik-ceriké jani. Cerik, kelih, tua,
bajang sesai nyatua pokémon di jalané.
“Kuda
batis Pokémoné? Besik? Dua? Telu? Papat? Apa tusing mabatis? Éngkén gobané?
Magoba jelema, buron, raksasa, léak, tonya, gamang apa memedi?” Kéto Dadong
Blenjuh matakon tekén cerik-ceriké di jalan.
Makejang
masuryak, sakit basangné kedék ningehang Dadong Blenjuh sesed matakon. Tusing
tawanga perkembangan jamané jani.
“Icang
suud malayangan!” saut cerik-ceriké tuni di jalan.
Dadong
Blenjuh sakit ati ningeh cerik-ceriké ngomong kéto. Kupingné panes, marasa
campahina. Kaliwat belog miribang Dadong Blenjuh kanti tusing nawang
perkembangan jaman. Kenehné macampur maadukan. Kaliwat gedeg basangné nepukin
tingkah cerik-ceriké jani marasa paling duega, paling sakti, paling tegeha.
Mara lekad ibi suba wanén tekén Dadong Blenjuh.
Nyén kedéna ajaka ngomong? Dadong Blenjuh, inan léaké dini.
Sasukat
Dadong Blenjuh pedih, désané serbi. Tusing bani anaké pesu ngawag-ngawag. Apa
buin nuju peteng kajeng kliwon, jejeh mentas di rurungé. Léaké makacakan.
Cerik-ceriké kapok nepukin Pokémon bisa makecos duur pos kamlingé bin sada sirahné lengar marupa celuluk. Delod
désané sasai ada Pokémon bisa kedék,
ngerikik padidina, maglayutan di punyan tiyingé kanti liu anaké labuh. Ulian
ento anaké jejeh ngejuk Pokémon.
“Suud
ngejuk kéto!” Dadong Blenjuh nuturin cerik-ceriké apanga suud ngelindeng di
jalanné. Apanga tusing nepukin ané tawah-tawah.
Sabilang
peteng Dadong Blenjuh jani demen majaga di rurungé. Lakar ngencanin
cerik-ceriké ané pasliweran di jalanné.
Tepukina
jani pos kamlingé ramé. Miriban saja
cerik-ceriké dini kalu, tusing kapok-kapok ngejuk Pokémon. Dadong Blenjuh suba
sayaga lakar ngelekas dadi bojog. Ia lakar kecas-kecos duur pos kamlingé apanga
cerik-ceriké jerih kanti telah pesu enceh.
Mara
nagih makecos, sagétan Dadong Blenjuh nepukin cerik-ceriké magadang ngaé
layangan. Ada janggan, pecukan lan bé-béan. Buung kenehné ngencanin.
“Dija
mani penékang layangané?”
“Di
carik Dadong Blenjuh!” kéto pasaut sekeha layanganné.
Dadong
Blenjuh ané suba ngelekas dadi bojog lantas kecas-kecos duur punyan-punyananné.
Kaliwat girang atinné ningehang cerik-ceriké lakar malayangan. Prajani ia
makecos mulih lakar ngaé dagangan. Anggona buin mani.
***
“Kopi, kopi, kopi!”
Dadong
Blenjuh ngaukin sekeha layangané. Girang
atinné jani nepukin cerik-ceriké teka. Cerik, kelih, tua, bajang malali
ka carik lakar menékang layangan.
Uli
semengan Dadong Blenjuh suba sayaga ngantosan. Anaké teka mablanja di warung
rompyokné. Uli ba dangin sekeha layanganné masuryak. Girang kenehné nepukin
anginné baret. Janggan, pecukan, bé-béané suba menék. Ngias langité,
mawarna-warni.
No comments