Mémé

Olih: Sadwika

 

"Kasih Sayang Ibu" Gagambaran Heno Airlangga

Ragané pinaka déwa sakala

ngembasang pianak ka jagat madasar lascarya

anaké maosang magantung bok akatih

setata wirang nindihin pianak ngetélang getih

Mémé...

sinampura aturang titiang

antuk katambetan titiang

antuk katambetan lan kasombongan titiang

tan prasida ngwales kaluihan mémé matatimbang

Doh drika ring guminé wayah

mémé makenyem pinaka ubad malaksana melah

anggén sesuluh idup ring natahé linggah

mangda nénten kentuk antuk sesolah

asiki bekel mémé, cening jemetang ragané masolah

bisaang ragané mabraya apang melah

eda stata ngaba basang layah

apang tusing guminé benyah

NB: Puisi sané mamurda “Mémé” kakawian Sadwika puniki naanin kawedar ring Bali Orti (Bali Post) Redité Kliwon, 19 Juni 2016