Ada Bojog Siluman Dini

Olih: I Putu Supartika

Sumber Gegambaran

Cai ningeh, dini jani liu anaké inguh. Kenapa? Ulian dini liu anaké nuturang indik bojog. Boya ja bojog ané ngeléb uli jumah anaké ané miara bojog. Boya ja bojog ané teka uli gunungé ngalih amah dini ulian amah-amahané di gunungé suba telah, krana gunungé suba gundul. Nanging ené koné bojog lén. Bojog siluman. Ada jelema ané masiluman dadi bojog.

Sujatiné tuturé ené suba uli makelo dingeh di margané. Mirib suba ada abulan anaké ngortaang bojog silumané ené. Yén saja bojogé ento nyak degeng, mirib sing kanti kakéné ortané ané dingeh di margané. Ulian bojog aukud ngaénang margané kaebekin bibih. Kudang satua kadén ané suba pesu. Jeg mabrarakan cara luu. Kudang tongos kadén ané suba anggona tegak nuturang bojogé ento. Ané ngaénang bojogé ené dadi tuturan, krana ia setata jail sabilang peteng. Yén ada anak ngaliwat di jalané, bojogé ento lakar teka lan majujuk nyeleg di malunné sambilanga ngajengit. Takut. Pasti kaliwat takut. Nyén sing takut nepukin bojog rikala peteng, apabuin tan mua ngeluang cai. Ada kanti bah ulian geluanga tekén bojogé ento.

Makejang anaké dini jani takut pesu peteng-peteng. Apabuin anak luh, anak muani dogén masih bisa takut. Yén dikénkéné ada ané pesu peteng pasti ngajak kanténan. Nawang cai kenapa sangkal kéto? Apang ada nabdabang disageté geluang bojog tur pingsan. Apang ada ané nyangkol ngaba mulih, yén sing kéto, apang ada nongosin di tongosé pingsan dogén.

Luh-luhé ané suba setengah umur ané biasané majalan ka peken jam roras peteng, jani sing bani peken. Adékana ia ngadep don, bongkak utawi busung di jumahné di sageté ada anak meli, yén ada ané nu ka peken pasti tengai-tengaian numpang ojék. Kéto masih dagang ané biasané mabukak jam 4 semengan, jani kanggoanga mabukak jam 6. Cai nawang kénkén guminé dini ulian bojogé ento. Tenget. Nakutin.

***

Ipidan dugas cai cenik, cai suba taén masih ngasanin unduké ené. Di marga-margané liu anaké nuturang bojog. Patuh cara jani tuturé ento. Miribké dini mula umah bojog siluman. Miribké dini liu anaké ané bisa masiluman dadi bojog.

Patuh masih cara jani, bojogé ento nakut-nakutin anak ané ngaliwat peteng-peteng. Jeg tan mua bojogé ento majujuk di malun anaké sambilanga ngejengit. Patuh masih cara jani, kanti ada ané bah ulian gelu.

Sabilang ada anak majalan ka peken tengah lemeng, maniné pasti ia nutur nepukin bojog, geluang bojog. Yén sajaké bayuné tusing gedé, mirib ia suba bah koné. Untung ia nu ngelah bayu gedé. Mara lakar nyemak batu, bojogé ento suba sing ada. Ilang mirib kija kadén lakuna. Jering buluné ningeh tuturé ento, miribké cai patuh ngarasaang kéto, bulun cainé jering ulian ningeh tuturé ento, lan cai sing bani pesu peteng-peteng.

Kanti dua bulan bojogé ento ngaé wargané dini inguh. Lantas ramé-ramé ia mapupul di balé banjaré. Mirib nyén kadén ané ngomando apang wargané mapupul ditu. Sagetan sandikalané ento suba ramé ada anak mapupul ditu. Ada ané ngaba parang, ngaba kléwang, ngaba batu, ngaba pentungan, ngaba lungan bata, ngaba tali, lan ada masih ané ngaba oncor. Suba tawang cai ngujang anaké mapupul ditu, pasti ia lakar ngejuk bojog silumané ento.

Petengé suba di malun matané. Ramé-ramé wargané ngalindeng ngalihin bojogé ento. Miribké anaké ané masiluman dadi bojog sing nawang yén ada anak ané lakar ngejuk déwékné petengé jani. Cara biasané ia masiluman dadi bojog lan nakut-nakutin anak ané ngaliwat. Makecos uli beté. Nyeleg di malun anaké. Ngédéngang giginé ané rangap, sambilanga ngejengit. Sakéwala lacur, anaké ento sing takut. Kenapa? Ulian ia suba ngaba gagemet ané kabagiang satondéné majalan ngejuk bojog. Lan ané paling lacura, anaké ento mabalik ngapuakin bojog silumané baan pentungan. Uli dija kadén tekan anaké liu, bojogé ento marasa awakné suba kakurung. Ia tusing nyidaang malaib kija, tusing nyidaang makecos ka punyan kayuné. Kénkén kadén undukné, jeg ilang kasaktian bojogé ento.

Tusing ja ada ané ngorahin, wargané negul bojog silumané ento, lantas paida abana ka balé banjaré. Neked ditu bojogé cangklinga di punyan buluané ané ada di natah balé banjaré.

Mani semengné cai gelu mara neked di balé banjaré. Krana bojogé ané macangkling ento tusing ja enu marupa bojog, sakéwala bojoge ento suba marupa jelema. Liu anaké ané mabalih kemu. Cai masuuk ka tengah apang cai nyidaang ningalin. Cai nyansan gelu, muan cainé karasa ada ané nampél keras gati disubané nawang yén jelemané ané macangkling lan dadi bojog ento tuah dadong cainé. Cai sing percaya tekén unduké ento. Cai ngasanin déwék cainé ngipi kanti cai mintel liman cainé. Sakéwala ento tusing ja ipian, krana dugas cai mintel lima, cai ngasanin sakit. Buin cai ngucek-ngucek paningalan, krana cai tusing masih percaya tekén unduké ento. Sakéwala lakar kénkénang buin sing mercayain unduké totonan? Suba seken-seken di malun matan cainé, cai ningalin dadong cainé mategul, awakné sebuh lan babak belur.

Untung dadong cainé nu idup. Untung dadong cainé tusing cakcaka kanti mati. Sakéwala dadong cainé sing bani pesu sasukat ento. Sabilang wai dadong cainé mubet di kamaré sambilanga ngubadin awakné ané babak belur. Dadong cainé lakar pesu rikala cai, bapan cainé, utawi mémén cainé teka ngabaang dadong cainé nasi.

Buin duang mingguné, dadong cainé ngutahang atma. Mirib ulian amah lek ané ngranayang.

***

Tiban-tibanan uli sasukat dadong cainé mati, sing ada buin anak ané nuturang bojog siluman. Anaké ngadén suba punah. Kanti jani cai suba nyansan tua lan dadi truna lingsir krana cai sing ngantén-ngantén--ulian cai sing nyak ngalih anak luh, buin dingeh cai kebir-kebiran orta indik bojog silumané ento.

Miribké bojogé ento lakar ngwales sakit atin dadong cainé ané ipidan tegula di tengah natah banjaré. Utawi miribké ento atman dadong cainé ané ondén maan tongos, sabilang peteng masiluman dadi bojog ngaénang wargané takut.

Puncakné dugas manis rahinan Kajeng Kliwoné, semengan tongosé dini nadak sara gempar. Wargané semengan suba malaib-laib ka pateluané delodan. Cai nawang unduké ento lan cai milu kemu nyagjagin. Di tengah pateluané ané bet --krana ada punyan tiing ngrimbun di duurné-- ada mayat anak tua nyelémpang. Mayatné seger. Tusing ada tampak jaguran, gorokan utawi sebuh di awakné. Tusing ada getih ané membah di tongosé ditu. Tusing masih ada ané ilang uli awakné. Bajuné, kambené, kéto masih udengné nu tileh. Ané sing nu tuah angkihanné.

Cara ada plalian kocokan wargané ngalinderin mayaté ento. Makejang wargané ditu ngaba petakon: kenapa? Yén sing polisiné énggalan teka lan ngaba mayaté ento ka tengah ambulané, mirib mayaté ento lakar dadi balih-balihan kanti mayaté ento rebut buyung.

Sing ada ané percaya teken asil otopsiné ané teka buin duang mingguné, ané ngorahang anaké ento mati ulian kena penyakit jantung. Dija ada anak désa bisa kena penyakit jantung? Wargané ditu jeg bani ngorahang yén anaké tua ento mati ulian geluang bojog siluman. Tusing ja besik dua wargané ané ngorahang kéto, nanging makejang wargané dini ngorahang unduk ané patuh. Sajabaning cai ané tusing ngorahang apa-apa.

Cai tusing ja nawang rikala sandikala wargané buin mapupul di balé banjaré cara ipidan dugas dadong cainé ketara dadi bojog. Aba-abaané patuh. Ada ngaba batu, kléwang, parang, tali, pentungan, lan oncor. Dijaké cai dugase ento, adi cai sing ada ditu?

Suba tengah lemeng, wargané majalan ramé-ramé ka pateluané, tongos anaké mati ané orahanga geluang bojog ento. Neked ditu makejang ngalih tongos mengkeb. Yén cai nawang unduké ento, pasti cai nyidaang nebag yén wargané ento lakar ngejuk bojog siluman cara ipidan. Sakéwala jani cai sing nawang unduké ento. Dugasé ento cai suba pules ngengkis di jumah.

Tusing makelo wargané mengkeb ditu, saget dipunyan tiingé ada ané krasak-krosok teka uli kauh. Miribké ento lubak? Rasé? Sakéwala tusing ja lubak utawi rasé, krana ento tuah bojog. Ikuhné ané lantang ngenah klépat-klépat di duur. Yén cai milu dugasé ento, pasti cai lakar nawang yén bojogé ento girang maglanting-glantingan di punyan tiingé lan ia tusing nawang yén liu ada anak ané ngintip di beténé.

Cara sing rungu tekén apa bojogé ento tuun ka jalané.

“Juk bojogé....!!!”

Tan mua bojogé gelu, ia makecos ka punyan tiingé. Wargané pesu uli tongosné mengkeb ngepung bojogé ento. Bojogé nyidaang melaib krana nasibné nu luungan tekén dadong cainé. Sakéwala lacur, dugas bojogé ento makecos ka punyan tiingé ada wargané ané nyabatang batu. Kena. Tendas bojogé kena batu lan ia malaib beneng kauh, sambilanga ngisiang tendasné.

Tengah lemeng cai bangun. Peluh cainé ngecah, cara anak suud magaé ngempug batu. Cai ngusapin sirah cainé baan limané, lantas tingalin cai liman cainé misi getih.

Singaraja, 5 Fébruari 2015