Ngiring Simpang

Olih: Nilarwati

Gagambaran olih I Nyoman Gunarsa

Yéning polih nglintang

Ngiring simpang...

Ring pondok titiang numpang

Kéwanten kanggéang...

Pét katon lelampahan wayang

Mangkin magirang, abosbos magarang

Kocap tan wénten sané iwang

Duaning sami sangkaning ki Dalang

Wantah titiang,

Tan prasida ngambekang liang

Belog matah turin matalang

Mawinan tan matemu galang

Ngiring simpang

Ka genahé embang

Masanggar tawang

Nangiang sangiang

NB: Puisi kakawian Nilarwati puniki naanin kamuat ring rubrik Bali Orti (Bali Post) rahina Redité Paing, 13 Maret 2016