Masuk Apa Ngantén

Olih: I Gedé Angga Para Darma

Gegambaran Olih Putu Supartika

Suba ada telung tiban Luh Sari metunangan ngajak Putu Asmara, uling ipun kari masuk ring SMP nyantos sampun SMA kelas 3. Pait manis anaké metunangan sami sampun karasayang ipun maka dadua. Miriban suba cara anaké makurenan, luas kemu-mai satata padaduanan. Yadiastun kari kabaos tonden pantes ulian nu cenik, nanging petunangan ipuné karasayang sampun ngalahang petunangan anak ané suba maumur lebih tekén 20 tibanan.

Yén di sekolah masi kéto, tusing ja nyak seken malajah kéwala sibuk ngenehang tunangan. Sing bisa madalem anak tuané ané suba tuyuh nganti mapeluh-peluh, maujan panesan ngalihang bekel masuk, ngalihang pipis anggona masuk, kewala di subané masuk boya nyak seken malajah nanging satata iteh matunangan.

Ulian bes keliwat sayang mémé bapané ngajak ipun, tusing med-med mémé bapané mabesen-besen nuturin apanga tusing kanti keliwatan metunangan yadian ipun nu masuk apang tusing nyanan sekolahné nganti pegat di tengah jalan ulian basangné ngedénan.
“Luh.. yén dadi bapa ngidih tekén nyai do malu bes sekensan metunangan, pelajahané di sekolah malu utamaang, yén uling jani nyai bes sekensan metunangan nyanan pelajahané di sekolah makejang sapin nyai.”

“Éh I bapa cara sing taén metunangan dogén ipidan,”

“Sing ja kéto luh awak nyai jani nu adané masuk nyanan pang danan ja beling sen awak nyainé, masuk sing pragat bapa pocol dadiné nyekolahang nyai yén kéto. Lénan tekén ento pastika lakar dadi omongan di masarakat, nu masekolah suba nganten, sing elek? Sing ngelah rasa pedalem ajak mémé bapan nyainé? Oo yén saja nyak nyai juanga be pragat urusané, di andéné nyai beling suudina lantas ajak tunangan nyainé apa lakar orang nyai? Nyén kal alih nyai orain nyai nanggung jawaban awaké yén sing mémé ajak bapa jumah. Yén mula ba pantesa, bapa sing ja kanti kekéné nuturin nyai oo, nanging né jani anak kondén adané pantes pang tawang nyai Luh. Yén jani sekenang nyai awak nyainé malajah mani puanan suba sukses sing ja lakar kuangan anak muani ané lakar tepukin nyai, ané bagusan, ané putihan ,ané luwungan pastika bakatang nyai.” Sada lantang bapané nuturin Luh Sari mapan ipun panakné paling sayanganga apang tusing kanti ipun pelih pejalan.

“Mendep éngken pa, masi Luh ané lakar ngaba bin mani puanan. Jelek melah ané lakar tepukin Iluh anak Iluh masi ané lakar nampedang, jani Putu Asmara anak sayang san ngajak Iluh, dibi dogén Luh ajaka melali ideh-ideh.Luh belianga panganggo ané melah-melah, sing ja kéné cara bapa satata meliang panganggo ané kéto-kétoan dogén. Bapa tusing nawang éngkén polosné Putu Asmara, lén ba bagus, putih, tegeh, ia sayangsan ngajak Iluh. Bapa sing demen éngkén ngelah mantu buka kéto.” Sada galak Iluh Sari nyautin bapané.

Bapané mendep tusing masaut apa-apa. Marasa suba emed nuturin ceningné ané kaliwat pengkung kangkung tusing taén nyak nuutin munyi anak tua, adana suba ragané ngalahang raga apang tusing nganti stroke ulian merebat, krana jani suba liu anaké nu muda-muda suba kena stroke ulian getihné menek.

Uling sekat ento Luh Sari nyansan-nyansan nakal, suba bani pesu peteng-peteng. Sabilang wai satata luas ngajak Putu Asmara. Kapah masi Luh Sari nyak masuk. Uli jumahné saja ngaku lakar masuk sakéwala tusing ja seken ka sekolah nanging malali sik Putu Asmarané. Suba kadung pelih pajalané Luh Sari, sing nyak nuutin munyi reramané. Tusing mapineh-pineh apa ané lakar tepukina bin mani puané. Iya bes sanget lénga tekén ané madan tresna. Tresna ané suba kadung ngaé ipun engsap makejang-kejang.

Nuju das lemah bolongé makesiab bapané Luh Sari ningehang pintu umahné ma grodégan. Mémé bapané ané tondén nyidang masaré ulian ceningné tondén mulih masaeban pesu, dapenanga Luh Sari mara teka uli malali atuanga ngajak tunangané.
“Apa gaén Luh adi kanti keli jani mara mulih? Sing nolih hp? Bapa ada ping solas nelpon-nelponin Luh nguda sing jemak-jemak? Mémé ajak bapa jumah kanti tusing ngidang masaré ngenehang nyai tawang Luh.” Galak bapané Luh Sari mirib uling tuni telpon-telpona kéwala sing jemak-jemaka.

“Aduh pa Luh suba kiapné, mani biin omongan.” Langsung macelep ipun kakamarné, sing ngenehang éngkén mémé bapané ngenehang ipun ané keli kéto mara mulih.
Dina terus maganti dina, duang minggu suba Luh Sari lambat mén, boyaja ngelah rasa jejeh nanging ipun demen krana anak muani ané paling sayanganga kadirasa pacang nyak nyuang ipun. Laut ipun ngalih Putu Asmara ka umahné lakar ngemang kabar unduk belingan ipuné. Masunar-sunar muané Luh Sari sing nyidang ngengkebang rasa liangné lakar nyambatang karma solah ipuné maka dadua ngajak Putu Asmara.

Disubané neked jumahné Putu Asmara ipun laut ngelut bangkiangné Putu Asmara sambilanga nyambatang unduké ento. Mara tawanga Luh Sari suba beling prajani lébanga gelutané luh sari, Putu Asmara marasa sing percaya Luh Sari beling, di andéné saja ipun masi ngaku tusing nyidang nyuang Luh Sari nganggon kurenan ulian suba kadung kajodohang ngajak anak lén.

Prajanian ngetel yéh peningalané Luh Sari ningehang pasautné Putu Asmara. Karasa benyah tangkahné. Karasa gulem muané sing cara tunian. Ipun laut melaib sing kuat ngrasaang pedih suba kabogbogin. Suba nganti amonto tresnané Luh Sari tekén Putu Asmara las ati Putu Asmara mlegéndang tresnan ipuné. Dikenehné mara ipun marasa pelih, suba tusing ningeh munyin rerama ané banget nyayangang ipun. Nasi suba dadi bubuh, né jani mara lantas ipun makamen di sunduk maselselan. Ulian bani tekén rerama, sing taén nuutin munyi anak tua, satata demen nyalanang kite, né jani mara tepukina ngajak Luh Sari.

                                                                             KUBU, 14 Januari 2016

NB: Satua cutet kakawian saking I Gedé Angga Para Darma puniki naanin kamuat ring Rubrik Médiaswari Pos Bali Minggu, dina Redité tanggal 7 Fébruari 2016.