Doh Sawat

Olih: Madé Taro

Sumber

Tampak cokor ring ungkur

kantun bengong, Déwa

durung nglimbak segara jimbar

durung ngregah gunung kawah

kocap jagi makalah-kalah

mutbut lateng ngiu

morbor lateng layar

Yéning wantah nolor

nampek, dayuh, tur landuh

tan péndah i weteng ebuh

nyedot angkihan ten kayun ngedigang tangkah

ngwilang bintang ten ngamolihang lelintangan

Napi luihan ring sang ngumbara

makudang warsa ninggal genah

makudang kadang sayang kutang

punika katrugtug kategul

karuruh sané patut kaweruh

mimih

kaliwat doh sawat, Déwa

Tampak cokor ring ungkur

kantun bengong, Déwa

pitulas segara gunung

durung prasida ngwangun raga

napi malih ngortén jagat

Becik urati soang-soang galah

becik jegjegang soang-soang lawat

sios punika doh sawat

NB: Puisi sané mamurda “Doh Sawat” kakawian Madé Taro puniki naanin kamuat ring rubrik Bali Orti Harian Bali Post Redité, rahina Redité Wagé, 14  Fébruari 2016.