Ari Dwijayanthi

Ari Dwijayanthi

Ni Madé Ari Dwijayanthi sampun namatang S-1 lan S-2 Jurusan Sastra Jawa Kuno UNUD. Dané embas ring Kelating, Kerambitan, Tabanan, tanggal 21 Agustus 1988. Sampun ngawitin makekawian daweg SMA lan kakwiannyané kamuat ring Bali Orti (Bali Post) lan Médiaswari (Pos Bali). Sané mangkin dané dados pangremba rubrik Médiaswari lembar mabasa Bali ring Pos Bali Minggu.

Ring warsa 2014 ngamedalang cakepan prosa liris sané mamurda “Blanjong” sané ngamolihang Widya Pataka saking Pémprov Bali. Dané prasida kahubungin ring émail: senja_menawan@yahoo.com

Niki wantah kakawiannyané sané mamurda “Ngantosang Ujan” sané kaambil saking cakepan “Blanjong.”

NGANTOSANG UJAN

(Ari Dwijayanthi)

Antosang buin akejep, apang ulungan ujané ngigisang. Ditu laut i raga majalan bareng mulih.

Umah Bliné di ulun atin tiangé, adaké masih tiang ngijengin atin bliné?

Ngancan peteng, ujané enu bales, punyan éndongé kanti nguntul naanang sakit tigtig ujan. Antosang tiang buin akejep, cara semayané tuni. Bli lakar ngalih disubanné ujanné nget.

Kewala ujanné tusing masih nget, apetengan bisa ujan. Apaké ujan ngaé kenehé anyud?

Antosang tiang buin akejep. Yén ujannné tusing masih nget, tiang lakar majalan mulih ka umah tiangé, padidi. Med tiang ngantosang, makelo tiang ngijeng di atin Bliné, kéwala ujan ngaé Bli nyeh ngédéngang tiang.

                                                Gema Merdéka, 8 Fébruari 2014