Liburan Yuk

Olih: I Gusti Lanang Sutéja Naréndra

Padiné mara kuma santen. Sedeng demenin kedis perit. Padaduanan tiang di carik, nongosin padi ngulah kedis. Uli radioné magending penyanyi dangdut lawas, Santa Hoki ngendingang Setangkai Bunga Padi. Paih...nostalgia tiang né.

Sedeng ngeribit jerijiné menikmati lagu, sagét I luh ngaraos,

"Bli, suud manyi liburan yuk!" Kéto raosné I Luh sambilanga ngedet-ngedetin tali lelakut ngulah kedis. Mimih...prajani jéjéng jerijin tiangé ningeh raosné.

"Paiiih...celekotokan Nyai, misi liburan. Dija ngalih kakécér?" Tiang nyautin sambilang ngepot-ngepotang jerijiné. Mirib asam uraté prajani kumat.

"Icang meled ka Singapur. Mapotrék di togog singané ané misi yéh mancur. Lakar posting di pisbuk, isinin tulisan: gais...kita lagi liburan. Paaaaiiihh....beber seru ento. Pisagané ané duhkita, prajani kumat busulné!!" Paliatné I Luh nerawang misi kenyem-kenyem, rasa suba neked di Singapur mirib kenehné.

"Wééé....pabedikin menghayal. Nyai menghayal terlalu tinggi. Ngelah baas acééng, suba makita liburan!"

Mara dingeha raos tiangé buka kéto, sagét beber nengéng nerirek matané. Tali lelakuté ampiganga kanti lelakuté nyalélég nagih bah. Sakéwala boya ento ngeranayang kedisé rarud, mirib ningeh raosné nengkik cara raksasi sedek datang bulan!

"Badah...katrok pesaja ngelah kurenan. Bes karoan mara ibi ningeh pidato , jani nak liu koné petaniné liburan ka luar negeri. Nawang unduké ento? Nawang? Nawang?!! ...."

Mbééé...tudinga matan tiangé tambis celeka. Tiang blekis blekis, masaut ngenduk. Sing juari lakar nimpalin, nyanan bisa pules diwang majangkut ajak i sémpol.

"Nyai, sikutang anaké déwéké. Petani ané kénkén ané nyidang liburan. Mirib petani sawit ané ngelah tegal linggah. Yén i déwék ulian nyakap carik duang tebih, akuda hasilné? Abetekan binbinan suba selamet. Tondén buin kena piak uli ané ngelah cariké. Tondén anggo mayah cicilan. Tondén anggo manyama braya. Tondén anggo marahinan. Piih... adep batun butuh blinè abatu tusing nyidayang lakar méyanin Nyai liburan!"

I Luh mendep. Paliatné sayan nerawang. Mimih... pedalem masi kurenané. Mirib suba med ajak hidup kelara-lara. Mara nagih ngetél yéh matan tiangé madalem, sagét buin ia ngelah rarikrikan.

"Bli...maling siap yuk!"

Duaaar....rasa macedar tangkahé ningeh raosné. Dadi bisa boya-boya kéto itungané I Luh.

"Mimih...seger nyai? Dadi boya-boya kéto itungané? Nyanan bangka Bli cakcak massa...apa laut orahang ibané, kalud pianak enu cenik!"

I Luh masaut dangsah pasaja. "Ento suba ané aptiang. Sayan tragis, sayan luung. Sayan liu anaké madalem. Ngeloh anaké lakar teka maang bantuan. Bli beber tenang suba dadi déwa hyang di rong telu. Lakar baktinin ping pitu awai. Baang Icang nabdabang hasil bantuané. Nyak cocok kéto?"

Mbééé kenapa dikau bisa sekejam ini Luh? Tiang tusing nyautin, anggap suba ngelah kurenan buduh. Yén né nemin idéwék milu buduh. I Luh mendep. Tiang masi mendep. Anginé ngasirsir ngampehang padiné ngoyag lemuh cara igel jogéd. Kedis perité sriak sriuk, buka ngibingin. Béh ngalier paningalané cara dupdupang. Mara lakar maseriet engsap, sagét buin I Luh ngaraos,

"Bli...ngaé usaha selip padi yuk. Dua triliun abulan batiné!"

Tiang mendep. Katos pesaja magelekan. Di radioné jani Maggy Z magending Gubuk Bambu. Ngarodok munyiné....baturainé soak.