Melajah Ngaé Lengis
Olih: Ni Komang Fébriantini
 |
| Gagambaran Manik Sudra |
Sasukaté ada Virus Corona ring
Bali, para murid-muridé liburanga tekén pemerintahé. Suba ada limang bulan
lebih di jumah malajah. Ulian inguh tiang ngalih kenehé liang apang tusing emed
di jumah. Apa buin jani hari Minggu tusing ada paplajahan. Matan ainé panes
nyentak, pas jam roras tengai tiang negak bengong, lantas mémék tiangé matakon.
“Ngudiang to Mang?Adi ngoyong gén?”
“Mé, tiang med gati pun jumah
melajah onliné lan sinyal sukeh gati ngalih ring désa, jak tusing ngerti pun
tiang, pidan ya tiang ngidayang masuk buin Mé?”
“Mimih déwa ratu, masak monto gén
kanti emed, Mang yadiapin melajah di jumah tusing ja melajah online gén
fokusangné, nanging iraga harus bisa masi ngemanfaatang waktuné ené anggén
melajah nyemak gaén lén, iraga tusing dadi males-males nawang, pang tusing
kanti emed, jemak gegaén ané ada gunané lan plajahin. Apa buin ada Virus Corona
tusing tawang buin pidan kadén lakar masuk, jani selegang malu Komang melajah diapin
di jumah.”
Bengong lantas tiang mirengang i mémé,
mamunyi sambilanga megedi mejalan ngajanang ka tongos abiané. Munyinné ngilang-ngilangang.
Lantas tiang ngojog balé tur mebalih. Tusing ada duang jam. Saget i mémé
ngaukin tiang.
“Mang mai ja!! Tulungin malu mémé, ajahina
ja.”
“Ngujang Mé?” Sagét ngenah i mémé
ngaba buah nyuh akranjang suuna, metingalin ling tengah jelanané, lantas empuga.
“Ngudiang to Mé? Liu sajan adi
ngempug nyuh.”
“Né suba peplajaan adané Mang, mai
tulungin ajaka ngaé lengis!”
Makesiab lantas tiang, mejam-jam makeneh-keneh,
kénkén koné carané ngaé lengis. Disubané tiang taén ningeh ngaé lengis nganggén
mesin pabrik.
“Éngkén carané ngaé lengis Mé? Mémé
tusing ngelah pabrik.”
“Tusing ja nganggén pabrik Mang,
mai!!! Jani tulungin malu mémé, sambilang malajah Mang!” Sasuudan i mémé
ngempug, tiang orahina nyeluh lantas ngikih.
“Mé éngkénang bin né Mé?” Jak ribet
sajan asané ngaé.
“.........” Mémé tusing nyak
masaut.
Sayan paling keneh tiang, sayan
kepung meled apang nawang carané yéning ngaé lengis tusing nganggén pabrik.
Sautina baan kenyem patakon tiang. “Tusing
ja kéweh Mang, yéning suba malajah jek pasti bisa.”
“Mai malu aba!”
Sesudan nyuhé mekikih, janga di
tengah cobék ané gedé, lantas i mémé nempuin yéh. Peresa lantas saipa enyuhé ané
suba makikih ento kanti dadi santen.
Sssubané dadi santen lantas
lebengina di paon kanti ngerodok nganggén panci ané gedé.
“Mé suba ajam lebih ngantosang éngkénang
mangkin?” kéto tiang matakon.
Masaut lantas i mémé. “Jani
tulungin malu Mémé ngangkid tur matandusin.”
Sesudan tandusina ngajak i mémé
mangkin tiang orahina ngantosang kanti dingin lantas lebengina buin ngajak i mémé
ané suba tandusina apang kanti dadi lengis.
Sambilang ngantosang, i mémé
ngajakin tiang negak, ditu lantas tiang ngaé téh. Suud ngetéh, tiang
nglanturang nyampatang umah kanti neked di pekarangané. Suud kéto nglanjut
tiang nektek dagdag ané aliha dibiné di abiané, lakar anggona maman sampi.
Galahé suba jam tengah telu, lantas
i mémé ngangkid tandusané tur aliha lengisné ejanga di botolé. Sasukaté i mémé
ngajahin ngaé lengis, jani tiang bisa ngaé lengis tradisional.
“Wantah akéntenan Mang jani
ngidayang iraga ngelah lengis tusing buin meli awak nongos di désa. Apabuin
jani kéwéh ngalih pis anggén mablanja. Ulian guminé jani ada Corona, yéning
nyuhé adep yadiastun mudah, jani kanggéang anggén lengis bedik-bedik.”
“Seken Mé, jani tiang bisa ngaé
lengis, ngidang ba jani nulungin Mémé ngaé apang sinah iritan mémé mablanja lan
ngidayang ngadep. Hahahaa..,” kedék lantas tiang kenehé liang.
Sesukaté i mémé ngaé lengis,
mangkin kulawargan tiang tusing taén buin meli lengis di masan Coronané ené, i mémé
ngidaang iritan. Lan jani tiang ngadep lengis yadiapin ané meli tuah ajak a désa
lan nyamané jani tiang ngidayang ngelah penghasilan yadiastun ngaé lengis
tradisional ené.
sisia SMAN Bali Mandara Singaraja.
.jpeg)
No comments