Puisi-puisi Ketut Suara Antara; Bancana Mancuh

Sumber Gagambaran; id.pinterest.com

jengking

 

majajujuk tegeh lantang

lima matungked di bangkiang

delik mata kadi paksi ngindang

munyi kadi punyané macarang

isiné mangumbang matalang

kadi rasa anak nangtang

 

matujuh ring tujuh

laksanané takut tuyuh

tusing nyak pesu peluh

ngandalang bibih lemuh

kemu mai ngandang nganjuh

cara anak mamuduh

 

ngengkebang sebengné pelih

ngalih élah aluhé alih

ngalih selah ané luih

makatang apa ané katagih…

 

 

bancana mancuh

 

uli pidan ngantos jani

lacuré matimpi

sebeté suba katampi

tan kawasa nandang duka lara pati

unduk pajalan manumadi

ngembeng yéh peningalan titiangé

nyelét kapipi ngantos kabibih

nyingakin guminé

gunung ngantos segara makejang abana

gunung ngaba abu

abu ngaba batu

batu ngaba lindon

lindon ngaba embid

embid ngaba yéh

yéh  ngaba blabar

blabar ngaba yéh peningalan

bajang truna kumasihan

lanang wadu sedih segu-segu

umah alas benyah mabrarakan

sami karasa akijapan

telas tan paguna

duh hyang bhatara guru

 

 

Ané Cén?

 

Ané cén beneh ané cén pelih

Ané cén selem ané cén putih

Ané cén peteng ané cén lemah

Ané cén jelé ané cén melah

Ané cén gugu ané cén saru

Makejang saru...

Makejang magarangin...

Men jani pamuputné?

Tuah linglung

Dini milu srayang sruyung

Dini milu bingung...

Ketut Suara Antara
embas ring Kubutambahan, 30 Januari 1999. Mangkin kantun kuliah ring Fakultas Dharma Acarya, Sekolah Tinggi Agama Hindu Negeri Mpu Kuturan Singaraja Prodi Sastra Agama dan Pendidikan Bahasa Bali.