Klangen Ati

Olih: IG Mardi Yasa

Gagambaran Manik Sudra

Dugas ento rahinan Umanis Galungan, I Begug luas malali ka tongos pariwisatané luwih tongosné ditu di pasisin segarané. Akéh wwang dura negara, dura désa lan ageng alit, luh muani jeg maadukan di pasisin segarané. Ditu I Begug angob tur klangen nepuk anak malali ka pasisin segarané. Di kenehné I Begug, “apa ya aliha kén anaké malalali mai,” kéto isin kenehné I Begug. Kéwala kayang ya tan pasangkan bareng melali kemu ka pasisin segarané.

Di pasisin segarané I Begug negak di balé saka pat ané maprda gedé, nyingakin anaké ané magelut, tur saling colék ngajak bungan atiné. Ditu I Begug buka cara kebo mabalih ombak bengong, mabalih anak malampu di carik tur sambilanga mabalih ombak ané saling pamalunin ngalih pasisi segarané. I Begug sané kalintang begug, bangras, kéto asliné I Begug. Makané I Begug sing ada nak nemenin lan sing ada anak né maekin. Saget jani I Begug suba med malali laut mulih ka umahné. Salantang jalan nadak sara ada anak nagih ngidih tulung tekén I Begug, sakémaon I Begug sing nyak nulungin sawiréh I Begug bes kaliwat begugné.

Anak ané nagih ngidih tulung tekén I Begug madan Pan Lumbur ajak Mén Jezi. Pan Lumbur lan Mén Jezi ngelah panak madan Ni Sukri. Ditu Pan Lumbur ngajak Mén Jezi makamen di sunduk santukan sing nyak tulungna kén I Begug. Ditu Pan Lumbur  ngomong, “Begug, buka adan cainé begug sing nyak matetulung, kalingké manyama braya metetulung gén  sing taén.” Kéto munyin Pan Lemburé sambilanga nyeeng I Begug, lantas sautinné ajak Mén Jezi.

“Yen bukak kéto, cai ngaba tingkah, ngaba awak sing kal luung tepuk cai, kal sengkala tepuk cai, buktiang!!!” sambilangan nuding I Begug, ditu lantas I Begug nayutin munyiné Pan Lumbur ngajak Mén Jezi.

“Nah, yén mulan cang jani nepuk sangkala, cang sing kal memegug buin lan sing kal ngenjekang batis wakéné dini, di tanah Pan Lumbur ngajak Mén Jezi!!!” kéto munyiné I Begug sambilanga negakin montor adéng-adéng.

Gelisang carita I Begug suba neked jumahné, laut bapanné matakon. “Gug, maan kija cai? Uling tuni antiang bapa,” kéto munyi bapané. 

Laut I Begug masaut, “maan ka pasih malali jani kan Manis Galungan, baang ja malali kapah-kapah,” sadah menyir nengéng bapané. Lantas I Begug luas ka kamarné, disubané di kamarné. Ia ngenehang padéwékané ané tan payu-payu lan sing ngelah tunangang, apa tunangan timpal luh dogén sing ngelah. Santukan kalintang begug tur sing nawang mapayas. Ditu lantas ada kleteg bayu lakar ngalih ané madan lengis colék, pengasih-asih, muah penangkab. Jani duasané luung pesan pas rahinan Umanis Galungan, jani ba lakar melali ka Kaki Tamané. I Begug metari ngajak bapané muah méméné. “Mé Pa, icang kal malali pesu jep, ngelimurang manah pang sing sumput otaké,” kéto munyiné I Begug. Laut Mén Begug nyautin, “nah, adéng-adéng ning,” kéto pesan munyiné Mén Begugé.

Né jani I Begug suba ked di umah Kaki Tamané, negak di kamar suciné I Kaki Taman ngaba canag yasa misi sasari séket tali piah. Ditu kaki taman matakon ngajak I Begug.

“Gug, ngudiang gelaé mai?” kéto pesan patakon kaki tamané.

“Ki, né tiang ada masalah bedik,” pesautné I Begug.

Lantas Kaki Taman nyautin, “bah..... né sing ada lénan kén céwék, pasti cai sing ngelah tunangan, jani cai mai sing ada lén pasti kal ngalih  pangégér, lengis colék?” kéto patakon I Kaki Tamané

Lantas I Begug masaut, “inggih Ki, to bé ané alih tiang mai, jani mapan Kaki ba nawang tatujon tiangé mai, gaénang tiang jani baangné nomber satu Ki.” I Begug masaut sambilanga mekenyem manis.

“Béh.. yén kéto aluh, da ba sangsaya ajak barang kakiné.”

Laut I Kaki Taman ngerajah, mantrain sarana ané anggona ngaé lengis colék muah pangégér to. Tusing ada tengah jam sagét Kaki Taman ba suud ngamantrain saranané to, laut kaserahang ban I Begug. Laut I Begug nampi lengis colék ajak pengégér ento laut I Begug matakon ngajak Kaki Taman.

“Ki, kéngkén carané nganggon lengis colek ngajak pengégérné?” kéto Munyiné I Begug.

I Kaki Taman masaut, “kéné Gug, nyanan yén nepuk céwék ané demenin cai, to lengisé colekin di limané, yén pangégérné jang di kantong bajuné utawi dija ja aluh baan ngejang. Laut I Begug mapamit budal ka umahné.

Mangkin gelisin carita suba rahinan Umanis Kuningan ditu I Begug buin melali ka pasisin segarané tusing engsap ia ngaba barang ané baanga kén Kaki Taman. Tongos I Begug malali né jani patuh sakadi Rahinan Umanis Galunganné. Disubané neked di pasisin pasihé biin I Begug klangen nepuk ombak ané saling pamalunin ngalih pasisi segarané. Disubané med I Begug negak di saka paté ané maprada gedé, makisid ia negak ka bongkol kayuné. Disubané negak di bongkol kayuné sagét ada anak luh nagih bareng negak di bongkol kayuné.

“Bli, dadi bareng negak dini?” kéto pesan munyiné Ni Sukri.

I Begug mesaut, “dadi Mbok, dini ba negak ajak tiang. Pang ada ajak tiang makeengan, men sira wastan mboké?”

Masaut Ni Sukri, “tiang mawasta Ni Sukri, men bli sira?”

Masaut I Begug, “tiang mawasta I Begug nika.”

Disubané  saling kenalan kanti tukaran nomber WA laut disubané saling tukaran nomber WA ked di jumahné buka dua saling chatingan ngantos kalemah ba kanti siapé pakruyk di duur punyan kayu né.

Nemangkin I Begug lan Ni Sari sampun madamar di carik. Yén rasa-rasayang sampun limang bulan matunangan, nangin I Begug tusing taén malali ka umahné Ni Sukri, kéto masih Ni Sukri tusing taén melali ka umahné I Begug. Ceritané jani ia buka dadua janjian lakar malali mulihné. Né jani I Begug malali ka umahné Ni Sukri. Di subané neked di umahné Ni Sukri jeg sagét teka bapané Ni Sukri uli abianné nedeng ngaba arit laut nuding I Begug aji arit.

 “Éhh, Gug inget pidan apa munyin cainé pidan, ada cai mamunyi sing lakar ngenjekang batis cainé dini di tanah wakené.” Kéto munyin bapané Ni Sukri sambilanga nuding aji arit.

Laut I Begugu masaut, “Pa, né pidan da ba ta sangetanga pa, sawiréh, tiang demen ajak pianak bapané.”

Bapanné Ni Sukri bes keliwat gedeg basangné. “Éhh.. cai Begug bas kaliwat corah tinggak cainné, yén petékan ping telu cai ondén magedi uli tanah wakéné kal angggon  nganggét baong cainé jani dini, magedi cai!!!” kéto munyin bapané Ni Sukri sambilangan mapetékan tur ngalih I Begug.

I Begug lantas nyerucut mulih cara bikul belus, tusing masaut jeg lantas was tan paorah. Disubané ked dijumahné I Begug lantas macelep ka kamarné, disubané ked di kamarné ia ngalekas nyutirupa dadi celuluk, disubané kéto lantas ia ngalih bapané Ni Sukri, nangin tusing ngidaang macelep ka pekarangané, santukan di pakarangané Ni Sukri kasengker baan benang mas. Disubané kéto ia buin mawali kajati mula.

Buin maniné sagét I Begug lan Ni Sukri suud matunangan. Ditu I Begug buin ia kaleng ngenehang undukné sané karasayang jani. Ulian munyinné pidan ia dadi suud matunangan. Né jani I Begug satata ngenehang unduké to kanti I Begug ngemasin buduh ulian ngenehang unduk ia suud matunangan ngajak Ni Sari tur kaamah baan lengis colék ngajak pengégér ané baan meli aji séket tali piah.

Bukit Tunggal, 12 Novémber 2020

IG Mardi Yasa
embas lan jenek ring Désa Kedisan lan kantun dados mahasiswa UHN IGBS ring jurusan Pendidikan Bahasa lan Sastra Agama