Lawat-lawat; Gending Bhatara

Olih: IGA Darma Putra

Sumber; id.pinterest.com

Nyansan liu jani anaké marebutin Bhatara. Kadéna Bhatara ento cara kasugihan ané dadi adep. Kadéna Bhatara cara baju ané anggona ngengkebin bulénan di awakné. Padahal suba liu anak malajahin shastra ané ngorahang Bhatara ento sing ngidang bakat gisi. Salingké ngisi, lakar tingalin dogén tusing ngidang. Salingké ningalin, kenehang suba tusing mampuh. Sing teked kenehé anggon ngenehang Bhatara.

Ané suba lumbrah masih di tuturé, jelema koné bisa dadi Bhatara. Liu ada satua ané nyatuang unduk jelema dadi Bhatara. Yén sing dadi Bhatara, sesingné ia bareng ditu di suargan ngoyot amerta, terus pules ajak dedari. Sakéwala sing aluh apang maan panugrahan buka kéto. Jelema ané dot neked di suargan sakéwala tusing mati, patut ia ngelarang tapa brata yoga samadhi. Makejang gegelarané suba patut, ada buin gegodan lakar teka nguug tapané. Ané sik malu gegodan jaen sakala.

Gegodané ené teka uli baga purus, teka uli Kama. Kama ento koné cara api ngerug ngaenang awaké kebus ngerodok. Nyak mesib cara gunung api ané dot makeplug. Yén gunungé ento makeplug, batu-batu tapa bratané bareng anyudang blabar api. Muncuk tapané cara muncuk gunung ané bongkang ulian keplugan. Sing mabudi koné tapa bratané yén suba kadung gedé Kamané ané ngaliput ukudané.

Suud ento musti teka gegodan jaen niskala. Jaen niskala ento teka uli tutur-tutur rahayu matitisang kamoksan. Apaké kamoksan ento dadi orahang gegodan? Yén Mpu Kanwa takonang, mirib ida ragu lakar nyautin patakon soleh buka kéto. Ida maosang anak ané suba neked ring tetujon ané utama, suba liwat ring kamoksan utawi kasunyatan. Sakéwala, yén kamoksan ento mialangin tetujon, Ida maosang kamoksané dadi gegodan. Cutetné, ané madan gegodan tuah sakaluir ané mialangin tetujon. Sang Arjuna tetujoné wantah apang menang di peperangan. Yén suba menang, lakar aturina tekén rakanidané ané mapeséngan Dharma Putra.

Ulian seken Sang Arjuna matapa, jeg seken rauh Ida Bhatara Siwa nyakala. Sakéwala Bhatara Siwa ané dadi patitis tapan Arjunané, sik malu dadi Kirata. Ditu lantas Sang Arjuna miegan ngalawan Bhatara Siwa ané sembaha. Apa mula kéto mirib gegaman anaké nyumbah Bhatara? Sasubané sembah, jeg iring ida miegan.

Salingké lakar ngalawan Bhatara, ngalawan awak padidi suba tusing nyidang menang. Tegarang takonin, nyén ané ngaku dadi tukang sembah paling nomor satu di guminé ané suba menang ngalawan indriyané? Ada kéto? Yén kondén, berarti kondén ngidang cara sang Arjuna ané matapa di guané. Sakondéné Sang Arjuna ngulengang keneh matitis ka-Séwan, enu Sang Arjuna nganggon kunda api lan sarwa sekar anggéna mapuja. Jani liunan anaké sing enu pajalané cara jelema nuut enjekan batis. Pajalan anaké jani cara dongkang. Kondén tamat besik enjekané, suba nagih makecos apang énggalan teked di enjekan nomor dasa. 

Kasus lénan masih ada ané terus nganggon harta brana dogén, tusing taén ngeningang kenehné padidian di karang suwung. Ané kéto orahanga cara sampi mategul di batan punyan binginé. Terus ia majalan, sakéwala mapiteh ditu-ditu dogén. Ada masih sampi males pragat pules ulian sayub maembon di batan binginé. Kadéna ibané suba maan suargan ulian ngidang pules misi angin kesir-kesir, buina misi ngembé gending-gending. Orahanga ibané sedeng mapuja aji gendingang. Ida Bhatara nak demen koné yén terus gendingin. Mirib ia ngadén Ida Bhatara cara jelema ané demen ningehang gending-gendingan rock’n roll: Aku cinta padamu, Kau cinta padanya!

 

IGA Darma Putra
embas lan magenah ring Bangli. Kakawiannyané kawedar ring makudang-kudang média, minakadi Bali Post, Pos Bali, Tatkala.co, Suara Saking Bali, miwah sané lianan.