Shunyalaya Ring Kauripan Miwah Kapatian: Seseleh saking Kakawian Ida Padanda Madé Sidemen

Olih: Putu Eka Guna Yasa

Sumber potrekan; https://docplayer.info

Singgih yayi pangekan ring ati, leyepen kang panon, sakeng urdha patemuan liringe, patemuaning akasa pratiwi, ring jihwagra singhi, nasikagra tinemu.

Rua kang windhu, ireng lawan putih, manahnia manon, kadi agraning rwi tungtung budine, ring daleming windhu den pinanggih, selaning supta eling, gumi sunia temu. [Geguritan Salampah Laku, Puh Mijil 14-15].

PURWAKA

Shunyalaya ketah katarka olih kramané wantah prasida kapolihang ri sampuné padem, lebar, lina, utawi nilar jagat mayané puniki. Panarkané puniki nénten iwang santukan yukti wénten pustaka sakadi Shiwaratri Kalpa sané nartayang indik juru boros mawasta Sang Lubdaka sané molihang Shiwalaya ri sampuné padem tur sadurungnyané ngamargiang brata Shiwa. Sakéwanten, panampén indik Shunya Laya sané wantah sida kapolihang ri sampuné padem punika nénten jangkep duaning wénten taler pustaka-pustaka sané maosang Shunyalaya inucap prasida kakeniang sakantuné urip. Makudang-kudang pustaka sané maosang indiké punika sakadi Jnyana Siddhanta, Ganapatitattwa, Wrehaspati Tattwa, Yoga Nidra, Geguritan Salampah Laku, miwah sané lianan. Makasami pustaka inucap maosang Shunyalaya sida kapolihang tatkala sari-sarin sirepé sida kakeniang.

Lianan ring punika, arang pisan para janané sané mligbagang salampah laku sang sané prasida molihang kalepasan sakantuné urip. Akéhan pustakané maosang makudang-kudang utsaha nglepasang atma tatkala kapatiané pacang kapangguh. Punika ngawinang nénten akéh pamargin sang sané ngamolihang Shunya Laya inucap prasida kaanggén tatuladan nyalanin kauripan nugtugang tuuh ring jagaté. Kahanané punika taler sané ngranayang kadirasa nénten wénten suluh anggén matitisang raga nyujur genahé shunya, yadiastun shunya laya sané artosnyané pateh ring pamargi kamoksan wantah pinaka silih tunggil srada ring agama Hindu. Sané ngresresin, akéh anaké sradha utawi percaya ring indik kamoksan, sakéwanten akidik sané arsa ngamargiang.

Manawi sangkaning pamargi ngruruh Shunyalaya punika kalintang sripit sané ngawinang nénten akéh sané kayun nuluh. Pustaka Wrehaspati Tattwané maosang wénten tigang parindikan sané patut kautsahayang tatkala wénten para jana sané arsa ngungsi Shunyalaya malarapan Tri Sadhana. Sané kabaos Tri Sadhana punika luiré Jnyanabhyudreka, Indriyayogamarga, miwah Tresnadosaksaya. Jnyanabhyudreka kasuksmayang pinaka utsaha nguningin sakancan ajah-ajah indik tattwa (wruh ring tattwa kabeh). Tattwa kocap ring Kakawin Dharma Shunya pinaka paramasastra sané nénten ngawinang sang sané mlajahin kaiket olih indik-indik sané kaplajahin. Indriyayoga Marga nénten lian ring mitet indria (ikang tan jenek ring wisaya). Tresnadosaksaya wantah parilaksana mutus sakancan kaleketan ring pikolih parilaksana becik miwah kaon (ikang humilangaken phalaning subhasubhakarma). Sang sané sampun prasida ngicalang sakancan pikolih marupa parilaksana becik miwah kaon punika kanirgamayang sakadi parilaksanan ulam sané tan nyisayang tampak tatkala molah ring toyané.

Yadiastun kalintang méweh, ring Bali nénten akidik gatra sané maosang wénten panglingsir sané sida molihang sarining kapatian. Ketahnyané anaké sané kadi punika kocap prasida uning galahnyané “mulih ka guminé wayah” antuk panarka sané tepet. Lianan ring punika, kocap taler lebar nénten malantaran antuk pinyungkan. Samaliha, anaké sané kadi punika magpag galah kapatian antuk pikayunan sané kalintang tragia. Silih tunggil pandita sané akéh kaangkenin olih para janané prasida ngamolihang sarining kapatian antuk cihna ring ajeng wantah Ida Padanda Madé Sidemen. Inggian gatrané puniki yukti utawi nénten, i raga nénten prasida mastikayang. Santukan wénten baos ring Kakawin Dharma Shunya, tan wruh yan prapti sané maartos nénten uning yéning sampun rauh ring genahé puniki.

Malarapan antuk makudang-kudang utsahan Ida Padanda Madé Sidemené nyiagayang sarana pabasmian rauh ring nyudi brahmana sané pacang muput upacara panelas Idané akéh para janané maosang Ida sida molihang kamoksan. Kocap ngawit saking keetan punyan dapdap sané pacang kaanggén wit geni tatkala pabasmiané kalaksanayang ngantos peti genah layon Idané pacang kagenahang sampun kasiagayang ngraga. Tiosan ring punika, Ida Padanda saking Gria Toko pinaka pamuput upacara panelas Idané ring jagaté sampun taler kaicén ajah-ajah olih Ida, yadiastun pamuput Ida sané kasudi ngriinin lebar. Panarka indik Ida Padanda Madé Sidemen molihang kamoksan punika nyansan maweweh yéning i raga ngwacén kakawian Idané sané maosang indik kasunyatan makadi Geguritan Salampah Laku.

DAGING BEBAOSAN

Salampah Laku Ida Padanda Madé Sidemen

Ida Padanda Madé Sidemen mawit saking wewidangan jagat Banjar Taman, Sanur, Dénpasar. Ida wantah kawi-wiku sané mayusa panjang. Yéning wilangin saking Ida embas duk rahina Anggara Wagé Dunggulan warsa 1858 Masehi kantos lebar ring rahina Soma tanggal 10 Séptémber warsa 1985 Maséhi, Ida nuluh kauripan ring jagaté puniki salami 126 warsa. Yukti yusa sané nénten cendek ring jadma sané nuluh kauripan ring masa Kaliyuga. Yusané sané panjang punika nglintangin tigang alikan jagat ngawit saking masa kerajaan, masa kolonial, rauhing masa kemerdékaan.

Duk masa kerajaan, Ida Padanda Madé Sidemen ketah maprakanti becik ring I Gusti Ngurah Madé Agung pinaka raja ring wewidangan jagat Badung sané taler seneng makekawian. Raja Badung sané kapastikayang ngawi Geguritan Niti Raja Sasana, Geguritan Dharma Sasana, Geguritan Nengah Jimbaran, Geguritan Hredaya Sastra, miwah Geguritan Purwa Sanghara inucap mapangarsa ring Ida Padanda Madé Sidemen mangdané nyurat Purwagamasasana utawi Siwa-Buddhagama duk tahun 1860 Saka utawi 1938 Maséhi. Ring masa Kolonial sané ketah pinaka kalisanghara pulina Bali, Ida Padanda Madé Sidemen muputuang Kakawin Cayadijaya (warsa 1863 utawi 1941), Kakawin Candra Bhairawa (warsa 1864 utawi 1942 Masehi), Kakawin Singhalangghyala (warsa 1865 Saka utawi 1943 Masehi), Kakawin Kalpasanghara (warsa 1866 utawi 1944 Masehi). Sapunika taler, ring masa kemerdekaan tatkala wewidangan jagat Bali druéné dados siki ring panegara Indonésia, Ida muputang kakawian sané mamurda Kidung Tantri Pisacarana ring warsa 1970 atau 1948 Masehi. Ring masa kemerdékaan taler Ida Padanda Madé Sidemen molihang cihna yasa (penghargaan) saking Menteri Pendidikan dan Kebudayaan antuk yasa kertin Idané nglestariang tur nglimbakang sastra daérah.

Lianan ring makudang-kudang kakawian sakadi sané sampun kawedar ring ajeng, Ida Padanda Madé Sidemen taler akéh ngaryanin tapel, togog, arca, kulkul, miwah wantilan. Ring Pustaka Lontar Ngatep Barong kabaos karyan Idané wénten ring genah-genahé puniki:

Mwang ngwat Astakosali ring desa Suminyak, mekardi Barong Ketet tkeng rangda mwang rarungnya. Ring desa Legian ngardhi barong tken rangda mwang rarungnya. Ring Banjar lantang Bejuh rangda 1, ring Banjar Gladag rangda 1, ring Pédungan rangda 1, ring Banjar Karang Suwung rangda 1, ring Banjar Béngkél rangda 1, ring Banjar Dauh Tangluk rangda 1, ring Tohpati rangda 1, ring Cramcam rangda 1, ring Tubuh Batubulan rangda 1, ring Sérangan rangda 1, ring Dlod Pasar rangda mwang rarung, ring Puri Kaba-kaba barong 2 tékeng rangda mwang rarungnya. Mwah ngardi kulkul 44 siki. Akweh wisayane yen wuwusén, bangga ngarannya, apan swakaryane bhasma sesa ngaranya,... [Babad Brahmana Mas]

Kantos mangkin, walatanda sané marupa tetapelan karyan Idané kantun kaanggén pinaka sungsungan tur kasuciang olih para janané ring Bali. Indiké puniki nyihnayang, Ida Padanda Madé Sidemen maderbé kawagedan nyelehin taru sané akas tur tampak sané becik sajroning natah tetapelan. Makasami punika karyan Ida sang néwata sané akéh katarka olih kramané prasida molihang genahé sunya. I raga sané kantun nugtugang tuuh nyalanin kauripané ring jagaté sampun sapatutnyané nénten surud-surud maguru ring salampah lakun Ida Padanda Madé Sidemen. Ida sané ngangkenin angga pinaka pangresek jagat tur mayasa lacur salami nyalanin kauripan patut kaanggén tetuladan olih para jana Baliné. Napi sujatinnyané sané dados saselik utawi ‘kunci rahasian Idané tatkala nuluh kauripan ring jagaté? Mawastu Ida akéh prasida ngripta kakawian tur nénten kidik ngaryanin walatanda saha ngaloka palasraya?

Shunyalaya ring Kauripan miwah Kapatian

Ring Geguritan Salampah Laku sané karipta olih Ida Padanda Madé Sidemen tatkala Ida mayusa 80 warsa akéh kabaosang sari-sarin pikayunan Sang Kawi-Wiku. Geguritan Salampah Laku madaging pamargin Ida Padanda Madé Sidemen tatkala Ida kasarengin olih rabin Idané ngamargiang paguron-guron ring Gria Mandara Sidemen, Karangasem. Duk punika, durung wenten motor sané kaanggén sarana ngiringang Ida mangda prasida digelis rauh ring Karangasem, mawinan salantang pamargi Ida Padanda Madé Sidemen mamargi kasarengin olih rabin Idané. Salami Ida Sang Hyang Surya kantun nyunarin jagat, sajroning Geguritan Salampah Laku Ida Padanda Madé Sidemen maosang Ida ngamargiang brata sané kabaos “tan supta rahina”. Napi sujatinnyané bratané punika?

Hana brata rahina tan suptā-turu, suptaning tĕtĕp inapti, sakĕdap denya awungu, sabhranyā-lungguh anulis, ring sawah nurat asing nggon.

[Geguritan Salampah Laku, Puh Megatruh, 9].

Punggelan kakawiané ring ajeng maosang brata sané nénten sirep tatkala siang. Sakéwanten, yéning pradé wénten sané tan prasida nanggehang arip, dados sirep wantah ajebos raris matangi malih. Sakantun Ida Sang Hyang Surya makarya nyuryanin jagat, i raga musti nénten dados nglepotang galah, napi malih kantos sirep. Ida Padanda Madé Sidemen nagingin galah idané duk rahina utawi siang antuk masasuratan. Ida sakadi nénten kaiket antuk genah tatkala masasuratan santukan Ida taler nyurat ring sawah-sawah. Indiké puniki kabaos “nurat asing gon” utawi masasuratan ring sakancan genah. Manawi brata rahina tan supta-turu tur nurat asing nggon puniki sané dados saselik Ida Padanda Madé Sidemen, sané ngawinang Ida akéh prasida makakawian sapanjang yusan Idané. Ida sakadi ngicen patitip ring iraga sareng sami mangdané yusané sané panjang kaanggén mayasa kérti ngrahayuang jagat.

Lianan ring ngamargiang brata rahina tan supta-turu, Geguritan Salampah Laku taler maosang indik yoga sané kamargiang tatkala wengi. Indiké puniki kasurat ri tatkala Ida Padanda Madé Sidemen kasarengin olih rabin Idané nuju Gria Mandara, Karangasem. Tan karasa Sang Hyang Surya sampun surup ring sisi kauh. Sakéwanten, Ida Padanda Madé Sidemen kantun mamargi nuluh pasisi. Ri sampuné dauh katrini ring wengi utawi jam tengah solas, rabin Idané kaleson tur arip. Indiké punika sané ngawinang, Ida Padanda Madé Sidemen nganikain mangdané rabin Idané sirep ring sisin sagarané. Sadurung sirep, Ida sang patni matakén indik yoga tan pasastra “pasudukning liring”. Malarapan antuk pitaken punika, Ida Padanda Madé Sidemen maosang yoga pasudukning liring.

Singgih yayi pangekan ring ati, leyepen kang panon, sakeng urdha patemuan liringe, patemuaning akasa pratiwi, ring jihwagra singhi, nasikagra tinemu.

Artos.

Inggih adi sikiang ring kayun, liepang panyingakané, saking duur patemon liringé (bunter), patemon akasa pratiwi, ring muncuk lidahé tajep, kecepukang muncuk irungé.

Wénten kalih windu, ireng miwah putih, pikayunané sané nyingakin, sakadi muncuk dui budiné, ring dalem winduné cingakin, ring selagan sirep matanginé, gumi sunia kapangguhang.

Punggelan pupuh ring ajeng maosang indik yoga sané kamargiang sadurung rabin Ida Padanda Madé Sidemené sirep. Yoga suduking liring ring ajeng maosang indik patemon akasa miwah pretiwi sané ring bhuwana alit kamargiang antuk nemuang muncuk irung sareng muncuk lidah. Nemuang muncuk irung miwah muncuk lidah puniki wantah nganggén sarana pangéka citta utawi panunggilan pikayun. Napi mawinan muncuk lidah miwah muncuk irung sané katemuang, nénten angga sarira lianan?

Santukan muncuk irung punika wantah wates pinih sor wewidangan purusa ring angga sarira. Kakuwub wewidangan purusa ring angga sarira nénten lian ring prabhu utawi duur utawi sirah. Selaning lelata ring prarai sering kabaos song langit, punika mawinan paung untek utawi rongga otak sering kabaos akasa. Daging akasané punika kocap untek, tur ring jun unteké wénten amerta. Indik muncuk lidah, punika wantah wates pinih duur saking pradhana. Wewidangan pradhana ring angga sarira wantah nganuunang saking muncuk lidah kantos muncuk jeriji sajroning cokor. Wewidangan pradhana inucap taler kabaos pretiwi. Puser wantah dasar pratiwiné sané kabaosang madaging geni angabar-abar, tur muncuk geniné punika wénten ring lidah. Masarana antuk bayu, amerta sané wénten ring unteké kocap katuntun rauhing muncuk irungé. Masarana antuk bayu taler, geniné sané ngabar-abar katuntun taler mangdané prasida muncuk irungé. Patemon amerta saking muncuk irung miwah geni sané wénten ring muncuk lidahé ngawinang medal andus. Andus puniki kabaos duma. Tur jiwan andus puniki kabaos Sang Hyang Dumaketu. Sira Sang Hyang Dumaketu? Ida wantah Sang Hyang Atma. Pustaka Tutur Aji Saraswati maosang ri sampuné Sang Hyang Atma sida kapolihang, raris kasimpen ring papusuh. Papusuh puniki sering kasengguh Gunung Seméru utawi Gedong Manik Swéta.

Pustaka Tutur Sang Hyang Aji Saraswati nartayang indik patemon akasa lawan pratiwi ring ajeng maduluran antuk sipta aksara. Akasa paragayan amerta kaniasayang pinaka Ongkara Sungsang tur pretiwi paragayan api kaniasayang pinaka Ongkara ngadeg. Ongkara Sungsang inucap magenah ring prabu sané kapah kawéntenané kadi puniki. Wiswa wénten ring bunter duuré, ardha candra wénten ring alis, windhu wénten ring selaning lelata, tur nadannyané wénten ring muncuk irungé. Tios punika, Ongkara Ngadeg pinaka niasa pertiwi punika ngadeg ring tangkah antuk pahan kadi puniki. Wiswa wénten ring tangkah, ardha candra wénten ring lengkung baong, windhu ring cédok baong, tur nada ring muncuk lidahé. Patemon nada saking Ongkara Sungsang sareng nada saking Ongkara Ngadeg pateh sakadi patemon amerta utawi toya ring api sané ngawijilang Duma utawi Atma. Ring sang sané seneng ngulik tutur kadiatmikan miwah kawisésan, geni sané mawit saking puser punika prasida kaanggén ngeseng sakancan mala ring sarira, tur sisan-sisan malané kaanyudang olih amertané. Ri sampuné prasida ngadegang Sang Hyang Atma ring papusuh utawi Gunung Seméru utawi Gedong Manik Swéta, Tutur Sang Hyang Aji Saraswati maosang sakancan satru nénten prasida nyengkalén.

Ri sampuné nartayang indik patemon akasa miwah pratiwi, Ida Padanda Madé Sidemen nganikayang ring selaning supta élingé kocap gumi suniané prasida kapolihang. Manawi ri sampuné ngamargiang yoga pasuduking liring utawi pasuduk swari, Ida Padanda Madé Sidemen nglantur ngamargiang yoga sané kasengguh yoga nidra. Ring ajah-ajah yoga nidrané parindikan ngruruh sarin sirepé prasida kapolihang. Ring sor puniki, ajah-ajah indik yoga nidra wantah kadi sapuniki.

Iti kaputusaniṅ sasaṅka sarana ṅa, elingakĕna de saṅ mahyun purṇnaniṅ sarira, tiṅkahiṅ ataṅi mwaṅ aturu ri sĕdĕṅiṅ lĕyĕp ikaṅ mata kalih. Turunakĕna saṅ hyaṅ ulan purṇnama riṅ siwadwara, ya paṅawakiṅ ataṅi parĕṅ lawan lĕyĕpiṅ netra kalih, apan karika ri tuṅtuṅiṅ iruṅ, ulihakĕna riṅ selaniṅ leṅiṅ ati, ya laṅit katattwania sĕṅguh sunya, ya paraniṅ ataṅi mwaṅ aturu, ya patĕmoniṅ pradana lawan purusa, kaliṅania ah mata kiwa, aṅ mata tĕṅĕn, oṅ nasikagra, etunian parok ikaṅ jagra lawan supta, ri patṅahiṅ hŗdaya. I rika paraniṅ saṅ pandita aturu, niṅ hanarawaṅ, ya sakala niskala, apaniṅ sunyata, yan katĕmu rasa maṅkana, tan hana sinaṅsaya kapati nira, apan kapaṅguh rasaniṅ aturu tan paṅipi, macakrabawa ṅa, etuniṅ Saṅ Hyaṅ Atma aputĕran iṅ swarga papa naraka. Eliṅakna, haywa cawuh. Iti yoga nidra.

Artos:

Puniki kaputusan sané kabaos Sasangka Sarana, mangda kaélingang olih sang sané mapikayun ngamolihang sarira waras. Tata cara matangi tur sirep, tatkala ngaliep panyingakané kalih tedunang Sang Hyang Ulan Purnama ring siwadwara, ida maka pangawak matangi tur sirep kala ngaliep panyicangaké kalih, saking muncuk pangungasané, bakta rauhing selagan bolong atiné, punika langit sujatinnyané sané kasengguh sunia. Punika sané dados tetujon matangi miwah sirep, punika patemon pradana miwah purusa. Duaning asapunika, ah ring penyingakané kiwa, ang panyingakané tengen, ong ring sajroning muncuk irung. Indiké punika ngawinang manunggal tangi lawan turuné ring tengahing hredaya. Ring genahé punika sang pandita sirep, hening suci, punika sakala-niskala, santukan sunyata. Yan kapolihang rasané punika, nénten wénten sané patut kasangsayain malih indiké pacang mati santukan sida kakeniang rasan sirepé tan pangipi, sané kabaos kacakra bawa, sané ngawinang Sang Hyang Atma mapincer ring suarga, papa, naraka. Élingang, sampunang caah-cauh.

Nénten doh ring daging Geguritan Salampah Laku, genah sunia pacang prasida kakeniang ri tatkala pacang sirep malarapan antuk nemuang purusa pradana. Yéning sampun indiké punika prasida katemuang, Tutur Yoga Nidra mastikayang nénten patut ajerih ri tatkala magpag sané kabaos kapatian. Punika mawinan, sadurung magpag kapatian i raga sapatutnyané nénten surud-surud malajahang angga ngruruh sunya layané sajroning kauripan. Ngruruh sunya laya sajroning kauripan tatkala sirep, wantah utsaha sané prasida kamargiang sadurungé i raga sirep sakayang-sakayang.

III

WASANA WAKYA

Malarapan antuk nyelehin makudang-kudang kakawian sané karipta olih Ida Padanda Madé Sidemen prasida kapolihang ajah-ajah indik shunya laya. Shunya laya utawi Siwalaya nénten wantah sida kapolihang ri sampuné sang sané ngaptiang kasunyatan punika nilar jagaté puniki. Sunyalaya utawi Siwalaya punika taler prasida kapolihang sakantuné urip majalaran antuk ngamargiang yoga. Yoga sané kapidartayang olih Ida Padanda Madé Sidemen sajroning Geguritan Salampah Laku wantah yoga pasuduking liring utawi ketah taler kabaos yoga pasuduk swari.

Yoga puniki kamargiang tatkala sirep malarapan antuk nemuang akasa miwah pratiwi sané wénten ring angga sarira. Sané kabaos akasa nénten wénten sios wantah magenah ring tungtunging irung. Sané kabaos pratiwi inggih punika muncuk lidah. Malarapan antuk nemuang purusa paragayan amerta miwah pratiwi paragayan api, prasida raris kakeniang andus sané pinaka paragayan Sang Hyang Dumaketu utawi Sang Hyang Atma ring genah muncuk lidah miwah muncuk irungé katemuang. Ngeniang Sang Hyang Atma pantaraning éling kalawan sirep punika kabaos ngeniang gumi sunya. Tetujon ngeniang Sang Hyang Atma ritatkala ngaliepang panyingakan tatkala sirep kabaos ngeniang sari-sarin sirep. Ri sampuné sari-sarin sirepé kakeniang sané kacihnayang antuk sirep tan osah tur tan paipian, Pustaka Yoga Nidra maosang nénten patut sangsaya malih sajroning mapag kapatian.

KAPUSTAKAN

Agastia, IBG. 1994. Ida Padanda Made Sidemen: Pengarang Besar Bali Abad ke-20. Denpasar: Yayasan Dharma Sastra.

Agastia, IBG. 2007. Memberi Arti Kehidupan: Membaca “Salampah Laku Ida Padanda Made Sidemen”. Denpasar: Yayasan Dharma Sastra.

Agastia, IBG. 2012. Pertemuan Ida Padanda Made Sidemen dan Cokorda Denpasar. Denpasar: Yayasan Dharma Sastra.

Suarka, I Nyoman. 2007. Kidung Tantri Pisacarana. Denpasar: Pustaka Larasan.

Lontar

Kakawin Purwaning Gunung Agung koleksi Pusat Kajian Lontar Universitas Udayana.

Putu Éka Guna Yasa
embas ring Banjar Selat Tengah, Bangli, 6 Januari 1990. Mangkin dados dosén ring Jurusan Bahasa Bali Unud. Nerjemahang makudang-kudang lontar, pemenang Pemuda Pegiat Literasi widang jasa saking Paguyuban Duta Bahasa Provinsi Bali 2018. Kakawiannyané kawedar ring makudang-kudang média masa, wiadin ring cakepan luiré Bali Post, Pos Bali, Prabhajnana (I, II, III), Angripta Rum.