Puisi-puisi I Gedé Angga Para Darma; Yadnya

Sumber Gagambaran; www.freepik.com

Yadnya

Mayadnya kadasarin antuk manah lascarya

Ampura boya ja tiang nasikin sagara

Santukan punika sané munggah ring sastra

Boya sangkaning sami wah, yadnya punika katrima

Pang ten yadnyané ulian mamaksa

Punika percuma

Duaning tan sami anaké pateh prasida

Sané prasida sampun ja

Sané tan prasida mangda nyidang masih mayadnya sasida-sidané iya

Sané penting baktiné kaaturin Ida

Sampunang sami kaseragamanga

Santukan pelangi punika melah sangkaning kaberagaman

Saraswati

Sarwa sastra mangkin kaulati

Anggén dasar pikayunémangda shanti

Rasa manyama satata ring ati

Apanga sida nemu prakanti

Sradha bakti anggén ngulati

Waluyaning jagat sané sutrepti

Ané tan wéntén mamati-mati

Taler mangda prasida molihang jayanti

Indiké punika sami mangda kaulati

Ring rahina saraswati

I Gedé Angga Para Darma

KUBU, 21 Januari 2017

I Gedé Angga Para Darma
mangkin kantun kuliah ring Jurusan Pendidikan Matematika Undiksha. Polih jayanti II nyurat cerpen basa Bali PKB XLI warsa 2019.