Putu Agus Sutrarama

Putu Agus Sutrarama embas ring Marga, 9 Fébruari 1984. Malajah nyurat sastra Bali modérn kala ngranjing ring SMAN 2 Tabanan. Kalih cerpén sané kasurat daweg ngranjing ring SMA, raris kamuat ring Wiyata Mandala (Bali Post) mamurda “Kenangan Manis” miwah “Keliab Kalung” warsa 2004. Ring warsa 2003, reriptan dané marupa satua bawak muang artikel indik Bali katerjemahang tur kawedar ring Bali Travel News (Bali Post).

Daweg punika, dané nyurat susastra nganggén bahasa Indonésia. Sasukat Bali Orti kamijilang marupa sisipan olih Bali Post, dané malih ngrenjit ngripta karya basa Bali modérn marupa satua bawak, gancaran, muang paparikan. Ngamedalang cakepan mamura Bulan Satwak warsa 2013. Kakawiannyané taler kawedar ring Médiaswari (Pos Bali), Majalah Éksprési miwah Suara Saking Bali.