Mitra
Olih: Désak Madé Yunda Ariesta
 |
| Sumber Gagambaran; www.wajibbaca.com |
“Tok-tok! Bli suba ajam tengah di WC. Apa kapesuang? Emas?”
Kéto sebilang wai Luh Ani magerengan ajak kurenané. Peteng lemah I Locong
pragat ngudik HP. Uling teka magaé kanti tengah lemeng HP-né tusing taén mapejang. Semengan né jani Luh
Ani lakar pesu mablanja.
“Bli, tiang ngidih pis lakar anggo meli darang nasi.”
“Néh pipis nem dasa tali.”
“Mih, adi tumbén polos pipis bliné pesu. Maan bonus bli
uling pak bos ae? Lakar anggon meli bé nah bli, makelo san i raga tusing naar bé.”
“Dingehang malu bli, né dasa taliné anggon meli darang nasi, kanggoang
tahu témpé kén gerang gén bé jaen.”
“Men ané séket né anggon apa?”
“Nitip beli kuota Luh nah.”
“Mimih déwa ratu.”
Galahé suba tengai, Luh Ani iteh bincuh nyemak gaé. Mebading ajak gaéné
I Locong ané iteh glayah-glayah ngudik HP.
“Bli, dong dadi ati bli kakéto buka wai. Tingalin ja kurenané
kapah-kapah. Ajak ngorta kurenané. Yan metakon apa dadi tulungin kénkén. Ento
tolih bin puan lakar odalan sanggah. Tiang nu ngékanang banten. Bli maleh-eleh
apa malu ngayah di sanggah.”
“Éh, apa tawang nyai Luh. Bli butuh masi ngibur nawang.
Kadén nyai sing kenjel magaé ngalih pipis. Nyai batas nyemak gagaén jumah dogén.
Sing misi ngitungang pipis. Suba peraha to nawang. Ené suba nyak bli jumah
ngoyong. Kalingan cara pisagané pragat di sisi ngalih mitra.”
“Mih bli, sing ja melénan bli ajak pisagané ento. Goban
mitrané gén melénan. Pisagané ento jelema. Bli barang bangka, HP-né ento. Sekaté
ada HP-né
ento suba, bli sing ngelah waktu. Kalingan lakar nulungin kurnan, ngorta ajak
tiang gén bli kapah iseng. Pipisé suba kemu doén lakuna.”
**
Kacrita galahé suba sanja. I Locong lakar mandus sambilanga masakit
basang. Patuh cara ibi puan HP-né tusing mapejang. Iteh mapanjer di malu matané.
Gedebwag!
“Luh... Tulung Luh!”
Dingeha munyiné Locong kauk-kauk uling WC. Melaib éncol Luh Ani. Nogdog
lantas.
“Bli, kenapa bli? Ulung bli ae? Nang bukakang malu jelanané
bli!” Kéto Luh Ani mamunyi sambilanga sigsigan, nyeh tekén unduk kurnané
kenapa-kenapa.
“Luh... HP bliné mecelempung ka song WC Luh. Kénkénang
nyemak né Luh?”
Luh Ani tusing mesaut. Tuah kedék ngikik. Tusing cara ibi puan. Jani bengang
bengong I Locong. Tepunika kurnané sing ngoyong-ngoyong. Paekina lantas Luh
Ani.
“Luh suud ja monto nyemak gaé. Ajak ja bli ngorta. Inguh
san kéné ngoyong.”
“Bli lakar ngorta? To pantingané malu ajak ngorta. Gaén
tiangé enu liu.”
Ané jani galahé suba peteng. Luh Ani suba ngebah malunan. Nyagjag lantas
ngéngalang I Locong ngebah di samping Luh Ani. Laut ngelut Luh Ani.
“Luh ujan-ujan kéné ngujang luungné?”
“Bli, unnebang ké malu jelanné naké.”
Ngengalang I Locong Bangun ngundebang jelanan, laut ngematiang lampu.
“Éh, bli, tusing ja uling tengah. Unnebang jelanané uling sisi.”
“Terus ngéngkén men bli Luh?”
“Kemu ka WC lakun. Song WC-né seluk, alihin mitran bliné ajak pules!”
magenah ring Karangasem.
No comments