Bom Makeplug rikala Ariana Grande Konsér; Nyénké Sujatiné Ariana Grande Totonan?

Idadané ningeh, utawi maan maca berita ada bom mekeplug rikala konsérné Ariana Grande di gedung Manchester Arena tanggal 22 Méi 2017? Yéning nawang, apaké ada ané patitakon nyén sujatiné Ariana Grandé totonan? Utawi ada ané suba nawang bedik-bedik lan dot nawang lebih liu ngenénin indik Ariana Grande?
Beneh pesan, Ariana Grande tuah penyanyi lan aktris terkenal asal Amerika Serikat. Ia lekad dina Saniscara Umanis, 26 Juni 1993 di kota Boca Raton, Florida, Amérika Serikat, lan mémé bapané maang ia adan Ariana Joan Grande. Méméné madan Joan Grande, lan bapané Edward Butera. Ia masekolah di Pine Crest School lan North Broward Preparatory School.
Dugasé cerik, Grande maan milu dadi anggota téater anak Fort Lauderdale, lan dadi Annie, tur tampil di musikal The Wizard of Oz lan Beauty and the Beast. Warsa 2008, ia maan peran pendukung dadi cheerleader Charlotte rikala acara drama musikal 13 di Broadway ané ngaénang ia menang National Youth Theatre Association Award. Ulian maan penghargaan rikala drama musikal totonan Ariana Grande nyansan terkenal.
Suud maan penghargaan National Youth Theatre Association Award, ia buin milu musikal baru lan ia dadi Miriam di musikal Cuba Libre warsa 2010. Pianakné Joan Grande ené masi maan peran dadi Cat Valentine di serial TV Nickelodeon ané majudul Victorius warsa 2010. Rikala meumur 17 tiban ia maan penghargaan serial TV terbaik di acara Kid’s Choice Award.
Grande mragatang album studioné ané kapertama mejudul Yours Trully bulan Juni 2013, lan albumné totonan laku kanti 130.000 kopi di minggu kapertama. Kanti jani, Grande liu pesan maan penghargaan, silih sinunggilné tuah penghargaan Billboard Mid-Year Music Awards, American Music Award, muah ané lénan.
Tanggal 22 Méi 2017 rikala ia konsér di Manchester, ditu ada bom bunuh diri. Dugasé totonan konséré mara pesan suud.  22 anak ané mebalih ngemasin mati ulian bomé totonan, tur 59 lénan metatu. Polisiné ditu mastiang ento tuah bom bunuh diri, lan pelakuné tuah Salman Abedi. Nanging polisiné sing percaya yéning Salman Abedi ngeplugang bom pedidina. (Kabasabaliang olih Supartika saking makudang-kudang sumber)


1 comment: