Bulané Gelah Cening

Olih: I Gst Bgs Wéda Sanjaya

To nguda cening ngepungin bulan?

Nerajang bangun kapupungan

Tusingké damar di kamar masunar samar-samar?

Entegang bayuné, petékin angkihané

Dibi sirep subaké magaleng maulu luan?

Eda pati purug, malaib gradag-grudug

Di margané liu bangbang nongklang-nongklang

Eda nganti ulung macemplung klincang-klincung

Adéngang tindaké, plapanang solahé

Idup eda ulah ngalih énggal

Énggal kelih, énggal dueg

Énggal bajang, énggal layu

Énggal ngantén, énggal balu

Énggal tua, énggal pikun

Énggal legak-legak....

To nguda bulan kepungin?

Ia tusing lakar ilang, juang anak dauh jurang

Jani cening né kuasa

Rérénang plaibé, entegang batisé

Tekekang enjekané

Tolih nuléngék

Bulané gelah cening....

NB: Puisi puniki naanin kawedar ring rubrik Bali Orti (Bali Post) Redité Kliwon, 28 Oktober 2012