Sekar Smara

Olih: I Nyoman Agus Sudipta

 

"Wanita Bali Menabur Bunga" Gagambaran R. Bonnet

Becik wiakti sané kaapti

Sarat pisan ngepus tur nyumpangang

Kadi sekar sandat sané stata miik mangalub

Yadiastun layu... Setata kagugu

Singsal ring laksana

Ten manut ring manah sané tinut

Sutresna bhakti sané arepang

Lémpas ring tutur lan agama

Bungan natah layu satondén kembang

Berek dibongkol raris ulung maguyang

I Tamulilingan malaib makeber

Usan ngisep sarin bunga

Cihna utama anak luh luih

Ilang apeteng ulian ngulurin smara

Wiguna tresna nyisayang sesel

Engsek rasa tuah dadi luu

Smara nibakang lara

Papineh peteng dedet ngaé ruwet

Sané luih sampun dados luu

Napi sané kaaptiang malih?

NB: Puisi puniki naanin kamuat ring rubrik Médiaswari (Pos Bali) rahina Redité, 7 Agustus 2016