Ngabén

Olih I Wayan Rudi

"Ngaben" Gagambaran Ida Bagus Ketut Panda

Sakadi nyawané ngababin, para wisatawan Jepangé ngungsi genah upacara Ngabén, motrét anaké ngigelang badé lan upacara sané anggén malebon. Para jatma saling pasuryak ngiringang badé sané pacang kabakta ka sétra. Daweg punika titiang sareng Luh Sari pada nyaksinin.

“Bli Wayan dados tiang matakén ngiih?” Luh Sari makipekan nyingakin tiang ané anyud nyaksinin badé tumpang tiga.

“Dados Luh, napi sané pacang katakénang I Luh?”

“Bli Wayan, napi sujatiné tetuek anaké ngaryanang ngabén punika?”

“Oh, kadénang bli napi, nggih, nggih mangkin kasaurin  bli pitakén I Luhé. Anaké patut nglaksanayang ngabén matetujon mangda atma sang jatma sané padem polih genah miwah dados manunggal sareng Ida Sanghyang Widhi Wasa.

“O, kéto bih bedik san tetujon sakéwala maguna pesan inggih Bli.”

Akéh pisan pitakén Luh Sari majeng ring déwék tiang. Ngawit saking nakénang budaya ngantos sané lianan. Galah sampun sué, badé sané ageng mamargi ring tengahingmargi Désa Rendang, kakawitin antuk ngamargiang patulangan wusan punika teragtag (titi mahmah) sané kakaryanin antuk tiang, sané pinih untat wadah ageng matumpang tiga mamargi.

Suryakang, “wuuu…,” ageng alit anaké masuryak nyolahang wadah ring tengahing pempatan. Tiang wusan nutur sareng Luh Sareng sawiréh angob nyingakin kawéntenan punika.

Para wisatawané sareng angob sakadi tiang, para wisatawan dura negara sakadi nénten makijapan nyingakin ngabén punika.

“Duh Bli Wayan, luung sajan Badé punika,” Luh Sari mamunyi ngaob.

“Beneh to Luh, bli sakadi anak kena pamingung, nénten mrasidayang punapa-punapi sangkaning angob pisan.”

Nénten marasa dauhé sampun soré, Badéné sampun mamargi ka sétra, tiang sareng luh Sari lan para krama sané nyaksinin pasolahan Badé punika ngéncolang majalan ka pondok soang-soang.

Tiang ngéncolang mamargi wantah limang menit duaning pondok tiangé nampek saking margi pempatan genah anaké nyolahang Badé. Tiang marasa bagia pisan sawiréh tiang prasida nyingakin utawi nyaksiang budaya Bali sané sampun kaloktah ka dura negara.

Wusan tiang marérén negak ring balé daja, tiang raris nuju genah pasaréan tiangé sané magenah ring delod balé daja, ring samping kamar blin tiané. Tiang ngéncolang malaib ka kamaré sawiréh tiang marasa kenyel pisan.

Rahina sampun semeng, tiang ngéncolang bangun wusan punika tiang nyaluk baju sekolah, pacang ngranjing ka sekolah sareng sawitran-sawitran tiangé. Wiadin  upacara Ngabén ring désan tiangé sampun wusan sakéwanten tiang nénten prasida ngengsapang napi sané sampun polihang tiang i rika. Ring déwék tiangé nerus wénten pitakén-pitakén indik ngabén. Sané mangkin tiang sareng timpal-timpal tiangésampun neked ring sekolah, bél sampun mamunyi tiang lan timpal-timpal tiangé laut mabaris lan nguncarang Tri Sandhya, wusan punika mamargi ka kelas sawiréh pacang polih palajahan Agama Hindu.

Sasampun ngaturang panganjali, palajahan kakawitin. “Sané mangkin bapak pacang matakén, sira sané uning, napi punika yadnya?”

I Wayan Subagia menékang lima, “tiang Pak, yadnya inggih punika korban suci sané kaaturang baan keneh sané sujati tan papamerih.”

“Beneh pisan buka pasaur Wayanné ento. Yadnya punika kaepah dados lelima kawastanin Panca Yadnya sané kadasarin antuk piutang (Rnam) inggih punika Déwa Yadnya. Rsi Yadnya, Bhuta Yadnya, Manusa Yadnya, Pitra Yadnya. Inggih alit-alit makasami palajahané sané mangkin indik pitra yadnya utawi ngabén. Sira uning napi nika ngabén?”

Luh Sari nyaurin, “ngabén punika upacara pitra yadnya sané kaanggén margi mangda atma sané sampun padem polih manunggal ring Ida Sanghyang Parama Kawi. Ngabén sané marupa Budaya Bali patut kalestariang mangdané kabudayan puniki kantun asri lan nénten ilang ring gumi Baliné. Wantah warisan saking leluhur i raga saking dumun.”

Tusing karasa galahé suba telah. Bél mamunyi, para sisyané pesu uli kelasé.