Uma

Olih: Jero Alit Bangah

"Membajak Sawah di Bali" Gagambaran I Dewa Njoman Tjita

Uma to ya bali

uma to ya binih

uma to ya umah

uma to ya melah

uma to ya somah

uma to ya bungah

uma to ya amah

uma ulian toya

Umané té dadi sing Bali

umané to dadi layah

umané to dadi idih

umané to dadi umah

umané to dadi juang

umané to dadi galang

Umané ya bisa lali

umané ya bisa jengah

umané ya bisa lalah

umané ya bisa panes

umané ya bisa kingking

umané ya bisa punyah

umané ya sing dadi beling

umané ya dadi ngipi

umané ya dadi gedung

uma keris dadi kingking

nyaluk duka siang ada toya

boya to ya

kuang toya tempuh panes ngutgut gumi

toya maya-maya

ilang sing ada nyusup

bendung alas batu umah dané agung

singa ada muncrat buin

nulak angin nuduk sapu matan ai

Sing ada uma bali jani

sing ada uma bibi jani

sing ada uma sakti jani

sing ada uma widhi jani

sing ada uma bhakti jani

sing ada uma muani jani

sing ada uma sidhi jani

Dija kadén melaib jani

            ilang toya

Dija kadén melaib jani

            ilang sidhi

Dija kadén melaib jani

            ilang siwa

Dija kadén melaib jani

            ilang sabda

NB: Puisi kakawian Jero Alit Bangah sané mamurda “Uma” puniki kaambil saking cakepan antologi puisi Bali modérn “Angripta Rum.”