Sarwatiga

Olih: Ngah Dipa

"Tri Sakti" Gagambaran I Nengah Wirakesuma

Patuh cara adané, jag sing makijep-kijepan Ketut Togog mebalih TV. Nyodog negak di malun TV-né. Mula sérius buina sing taén nglémpasin acara TV, apabuin minggu-mingguné ené sesai kasiarang orti, réviéw, ulasan indik Pacentokan Miss World di Bali. Kadirasa Ketut Togog kemeng tekén anaké ané tusing setuju parikramané ené kalaksanaang di gumi Nusantara.

Sayan seken Ketut Togog menehang tegakné, wiréh petugas ané maang koméntar, mula lengut, luget baana nyatuang alasan, tetujon, patitis adaangan pacentokan buka kéné.  Menyayangkan wiréh ada anak, ulian tondén tatas nawang, ondén apa-apa suba tusing setuju, protés kema mai, nagih nytop muungang parikramané ené, kayang I Kaki Dengkil uli Tepisiring morta nagih milu démonstrasi, ajaka jlema uli dura Bali, gumanti apang tusing payu  ada pemilihan Miss Wordl-é ento. Sambilanga bengong ningalin siaran iklan, Ketut Togog nyadsadin limanné mapeluh, buin ngrenggeng di atinné. “Yén jati-jati té tlektekang, manut panyambrama penyiar, pacentokané ené sajan-sajan tusing ja koné ngédéngang kaadanin beauty,enu ada duang pahpahan ané dadi uratian pacentokané ento, mangda kacutet dados 3B, minakadi: brain  ‘keduegan- kepradnyanan, wawasan lan béhavior ‘solah,prilaksana ané maadan prilaku’. Yén saja seken-seken té kenehang buin, ené luung pesan yén iraga sesai berfikir positif, pastika lakar maan ajah-ajahan, ulian nawang suksman pacentokan buka kéné. I raga—sakadi manusa yén bisa ngresepang—apang dadi maguna lan nyidayang nuutang pakibeh jagaté. Ené tusing ja bentuk fisik doén ané mesti melah tur mulus, pikiran, kaduegan gumanti apang prasida alus, maimbuh bikas ané dahat tulus. Apang tusing cara sesenggaké ‘lén suba jelék goba, jelé papineh misi corah buina semu usak lan berek.’

Asanné sawai-wai Ketut Togog maan dogén mabalih siaran langsung Miss World-é, tepukina di TV pamileté saget luas ka Ubud, suba kéto nyerahang wantuan ka panti sosial, macanda ajak sakancan buron di kebun binatang, misi milu olahraga tarik tambang, mabelanja di shopping céntré. Ané dahat naut uratian Ketut Togog, dugas pemileté ngaturang bakti di Pura Besakih. Angob masih ningalin, nyak pada nganggo busana Bali. uli koméntar guidé ané ngatehang, pamileté maan penjelasan indik kawéntenan palinggih-palinggih, undagan mandala palemahan ring pura lan wawangunan siosan. Manut informasi, ngenénin mandala sané sampun katami saking riin, ring pura sané ageng, pastika drestané nganutin siwakarma trimandala. Wénten utama mandala sané dahat sakral-suci, linggih Ida Bhatara Sungsungan, genah ngaturang banten tur tongos pamedek negak mabakti. Buin aundag beténan kaadanin madya mandala genah ilén-ilén luiré gong, gambang, angklung, pashantian, igel-igelan, rejang déwa, baris gedé, wayang gedog lan sané sios-siosan. Yén nista mandala, paling tebén tongos pamedeké masandekan-ngetis, genah pengayahé nunas ajengan, wénten malinggih magibung di balé lantang. Ring mandala paling betén niki biasané ada wantilan misi aréna kramané ngadaang tabuh rah-tajen, sing kuangan ada pétak-pétak warginé madagang sarwa lebeng lan tebihan jimbar tongos parkir.

Sausan negak mabakti, ngenah pamilet Miss World sané kabaos rauh saking 130 negara, kaketisin tirta wangsuhpada utawi banyuncokor Ida Bhatara, mabunga koping kébot tengawan, lantas kaicén wija. Pamileté maan informasi minakadi dija tongos mawija, kénkénang wijané ento, akuda nyemak liuné.Guidé ané suba cacep nganggo basa Inggris, ngorahang wijané ené madan graceful-ricé, paica sekala saking Ida Hyang Widhi, patut katerima tur katunas apang maguna ring nincapang kauripan spiritualé. Ada tatelu tongos wijané, manut guidé ento. Jemak wijané telung besik ané galih, deketang di gidat, suksmané apang iraga ngelah pamineh, wiadin manah suci nirmala, nénten madué pikayunan kaon, ten makeneh usak-usak lan berfikiran négatif. Buin jemak wija telung besik, “kénten guidé malih ngwewehin atur.” Uluh! Eda pakpaka, wiréh yén uluh ento ngelah tetujon apang iraga maan ngrasaang mreta nyusup ring sahananing angga. Ené koné misi suksma apang iraga polih kawagedan matur-atur ané pantes, tusing mamunyi sada bangras, apabuin ngorta nyakitin kuping anak lénan. Buin jemak wija tatelu, pejang di bongkol batun salak baongé uli malu, macihna apang iraga maan tuntunan malaksana ané patut, maparisolas ané anut. Guidé masi maang tatuek indik nyemak wija telung besik lan wija ané galih. “Ngudiang tatelu nyemak wija?” Kéto guidé nerangang sahasa matakon, lantas langsung padidi nyautin, “kéné, wacakan tatelu punika kaketus saking konsép Tri Kona sané madaging: uthpati, sthiti, lan pralina, kocap i manusa nénten dados pasahang saking prosés lekad, hidup, lantas nénten dados kelidin yén sampun pituduh, samian sané maurip pacang padem. Buin guidé nuekang patitis wija ané galih, “yén ada, tunas wija ané tusing kepéh, ené kocap madaging pratiwimba, sajeroning iraga polih paica, pilih ané jangkep utawi utuh. Iraga ajak makejang tetep ngaptiang waranugraha ané puluk tén ceda nang akedik.”

Yén inget-ingetang, wiréh Ketut Togog sesai mebalih acarané ené, uling dugas mara lakar nyumunin, manggala pacentokanné ngawitin purwakaning atur, saha ngrauhang, uli ipidan sampun kalaca-laca apang mrasidayang ja, nglaksanayang parikrama Miss World-é di Bali. wireh yén nyidayang buka kéto, apabuin bertaraf internasional, pasti lakar maang imba signifikan. Wénten tatiga seshanti sané dados patitis, pinaka obsési sajeroning wong maurip. Manut dané, i manusa koné yén hidup mesti ngelah tatelu pangapti, ané kasinanggeh dados 3L, kategesin nganggo basa Inggris: livé, lové, lan légend. Béh mula kasub penyiaré ané maang ulasan, awanan Ketut Togog tusing makisid-kisid negak, jag sing makrisikan nang abedik mabalih TV, tatas baana mirengang, yén livé, kocap iraga ajak makejang minakdi sarwa prani di guminé dot hidup, lakar nincapang kauripanné, tusing ja i manusa dogén dot hidup, i taru, i semut, patuh ngelah tetujon kéto. Lové, sajeroning hidup, apang hidupné lanus tur bagia mesti madasar kasih sayang, welas asih, sing dadi galak saling sikut, mamati-mati, magedeg-gedegan, lan iri hati. Yén légend, kénkénang hidupé ané acepok ené apang ingetanga tekén anaké, melegénda apa adanné. Ajak makejang dot apang ada temon-temon, ngwarisang yasakérti, ané dadi ingetanga tekén pianaké, cucuné, tur nyama brayané. Pangéling-éling buka kéné apang sujati nyidayang nyukertaang kulawarga, sameton pakramana lan pakuuban jagat. Pacentokané ené maka cihna lakar dadi mémory kramané ajak makejang. Ketut Togog mamarma “Bah sasukat ada pacentokan ené apa buin kasarengin pamilet saking mancenegara... jag lakar dadi inget-ingetan, tusing bakal engsapang kawekas.”

Sambilanga bangun ayad-oyod, batisné kasemutan Ketut Togog makiles ngamatiang TV, wiréh suba macelies seduk basangné, ngénggalang majalan ka paon misi ngrimik. “Bilih-bilih di guminé ené, enu liu bacakan tatelu, sarwatiga ané dadi anggo sasuluh. Ada koné buin kasambat Tri Kaya Parisuda, Tri Murti, Tri Datu, Tri Rna, lan tri...tri ané lénan. Ené makejang bacakanné sarwa tatelu ané kapercayain angka berkah bertuah.

NB: Satua Cutet kakawian Ngah Dipa (Nengah Sudipa) sané mamurda “Sarwatiga” puniki naanin kawedar ring rubrik Bali Orti (Bali Post) rahina Redité Kliwon, 13 Oktober 2013.