Mikukuhang Sang Angawérat ring Kapatutan Basa, Aksara, miwah Sastra Bali

Olih: I Gusti Bagus Wéda Sanjaya

Sumber Gagambaran; balinewsnetwork.com

Kawéntenan basa Bali sané naénin tamis-tamis padem, mangkin sampun saka kidik mawali maurip. Tan bina sakadi kawentenan méga sané ngawinang basa Baliné remrem, saka kidik sampun katampuh angin. Basa Baliné ngawit masunar malih.

Sunaran utama sajeroning kawéntenan basa Baliné nénten wénten tios wantah embasnyané Peraturan Gubernur Bali Nomor 80 warsa 2018 indik basa, aksara, miwah sastra Bali. Pergub punika misaratang kawéntenan rahina mabasa Bali, inggih punika nyabran rahina Wrespati mangda maka sami pegawé, guru, miwah siswa ring sajebag Bali prasida mabasa Bali sajeroning mabebaosan. Tiosan ring punika, papan nama instansi pameréntah wiadin swasta taler kaaptiang prasida ngunggahang aksara Bali.

Ring sajeroning nyanggra kawéntenan Pergub punika, krama Bali masikian ngicénin panampén sané becik tur mapidabdab sapunapi mangda prasida mabasa Bali sané patut tur anut ring tata titi tur anggah-ungguhing basa. Bilih-bilih ring sajeroning widang formal, minakadi rapat sané kalaksanayang ring rahina Wrespati majanten taler patut ngunggahang basa Bali. Bali ngranjing ring era baru basa Bali.Sakéwanten metu raris pikobet, duaning akéh widang pakaryan sané nénten prasida kabaosang wiadin kasobyahang antuk basa Bali utawi durung kauningin basa Balinnyané. Kruna-kruna ring widang pendidikan, pariwisata, kesehatan, miwah sané lianan, sané sampun ketah kaucapang sakéwanten durung janten kaserep ring basa Bali jagi ngawinang metu manah kagok rikala ngunggahang, bilih-bilih ring basa sesuratan.

Pinaka imba, kruna basa Indonésia ‘wajib’ prasida kaimbangang ring kruna ‘patut’ sajeroning basa Bali, mawinan lengkara ‘Ia wajib hadir jam 7 pagi.’ Prasida kabasa-Baliang dados ‘Ipun patut rauh ring galah 7 semeng.’ sakéwanten yening wenten kruna ‘pelajaran wajib’ karasa nenten anut yening dadosang ‘paplajahan patut’. Napiké prasida kaunggahang kruna ‘paplajahan wajib’ utawi sapunapi?

Asapunika taler ring kawéntenan aksara Bali sané kaunggahang sajeroning nyurat wastan jalan, wastan kantor, wiadin sané lianan. Kantun akéh sané nénten janten kapatutannyané. Minab kantun leket ring manah iraga, daweg dané Gubernur Bali ngresmiang aksara Bali ring airport I Gusti Ngurah Rai, wénten sané ngemanahin sesuratan aksara Bali ‘I Gusti Ngurah Rai’ sané kaunggahang punika nénten nganutin pasang aksara Bali.

Tios ring punika, sesuratan ‘Kantor Bupati’ antuk aksara Bali ring soang-soang kabupatén taler kantun mabinan. Wénten sané ngunggahang aksara wrehastra, wénten taler sané ngunggahang ‘bakembang’ miwah ‘suku ilut’. Sané encén sujatiné sané patut? Ring kuuban provinsi miwah kabupatén manten sampun receh indik kapatutan aksara, majanten ring genah wiadin galah lianan, akeh krama Bali sané manggihin pikobet sané pateh sakadi asapunika.

Raris, ring dija iraga patut masayuban yéning manggih pikobet sajeroning nyurat aksara Bali? Utawi rikala iraga nénten uning basa sané patut kaunggahang sajeroning ngentosin basa Indonésia, sira sané patut katakénin?

Silih tunggil sané prasida pinaka genah masayuban, genah mapitaken indik kawéntenan pikobet punika wantah sameton penyuluh basa Bali. Kawéntenan penyuluh basa Bali ring soang-soang désa nganutin Pergub Bali nomor 19 warsa 2016 puniki majanten sampun akéh makta pikenoh becik ring kawéntenan basa, aksara, miwah sastra Bali. Sakéwanten, ngantos mangkin kantun karasayang linggih para penyuluh ring desa durung becik katampenin olih krama desa. Waluya kirang caling, taksu para penyuluh pinaka sang kagugon sajeroning basa miwah aksara durung prasida karasayang. Nepasin kawéntenané punika, para penyuluh sapatutné madué tedung paneeb ring provinsi sané prasida nedungin tur kacumponin pinaka angawerat ring basa, aksara, wiadin sastra Bali.

Yéning selehin ring sajeroning Pergub nomor 80 punika, ring pasal 9 kabaosang Gubernur ngwangun Lembaga Bahasa, Aksara, dan Sastra Bali sané madué swadharma sajeroning ngicénin perlindungan, pengembangan, pemanfaatan, miwah pembinaan sajeroning pemajuan basa, aksara, miwah sastra Bali. Yéning baosang indik kawéntenan lembaga puniki, sepatutnyané prasida pinaka angawérat utama sajeroning maosang indik basa, aksara, miwah sastra Bali majalaran antuk ngwentenang pasamuhan alit wiadin pasamuhan agung basa Bali.

Kawéntenan Lembaga Bahasa, Aksara, dan Sastra Bali puniki taler ngantos mangkin durung leket ring kauripan krama Bali. Durung akéh sané uning kawéntenan miwah linggih lembaga sané sujatiné dahat mapikenoh puniki. Yéning iraga nelisikin ring google indik kawéntenan lembaga puniki, taler durung akéh artikel wiadin orti sané maosang. Sané munggah, wantah orti indik pasamuhan alit warsa 2019, sakéwanten taler nénten nyarca pikolih saking pasamuhan punika.

Lembaga sané kawangun antuk para wagmi, wikan, sajeroning basa, sastra, budaya, wiadin seniman puniki patut kaicén linggih sané luih ring wewidangan provinsi Bali. Krama Bali supatutné rumasa madué panedung sajeroning pikobet basa, aksara, wiadin sastra Bali. Sang sané kajudi pinaka angga lembaga puniki patut kacumponin tur kajunjungang olih krama Bali. Lembaga Bahasa, Aksara, dan Sastra Bali patut pinaka angawerat sajeroning kapatutan basa, aksara, wiadin sastra Bali.

Sané pinih utama sajeroning ngaryanang linggih luih ring kawéntenan lembaga puniki, wantah pidabdab nyobyahang utawi sosialisasi majeng ring krama Bali indik kawéntenan genah nepasin pikobet sajeroning basa, aksara, wiadin sastra Bali. Bilih-bilih, mangda para yowana Bali uning ring kawéntenan lembaga puniki, patut kasobyahang nganutin pamargin aab jagat, minakadi kawentenan media sosial miwah media sané lianan.

Lembaga puniki taler kaaptiang madué nara hubung sané prasida katakénin nyabran galah indik pikobet sajeroning basa sané kapanggihin olih krama Bali. Indayang kayunin sapunapi dangan iraga pinaka krama Bali yéning manggihin pikobet sajeroning mabasa Bali, wantah kirim pesan ring FB utawi Instagram, utawi taler majalaran whatsapp mangda prasida manggihin pamargi. Rikala pacang makarya plang nama instansi, wantah ngirim émail ring lembaga puniki sampun prasida kaselehin sesuratan aksara Baliné napi sampun nganutin pasang aksara napi durung.

Kawéntenan sameton penyuluh basa Bali taler mangda sairinga ring kawéntenan lembaga puniki, mawinan sameton penyuluh prasida pinaka prakanti lembaga bahasa, aksara, miwah sastra puniki sajeroning nyobyahang kapatutan basa, aksara, wiadin sastra Bali. Saparindik basa sané patut kasobyahang, minakadi kaiwangan-kaiwangan sané ketah kapanggih, utawi pikobet-pikobet sané akéh katakénang raris kasobyahang majalaran antuk media sosial sakadi vidéo ring youtube, poster miwah meme ring FB wiadin Instagram.

Majalaran kawéntenan tedung sané kukuh punika, penyuluh basa Bali jaga prasida ngukuhang linggih pinaka sang kagugon sajeroning basa, mawinan para panglingsir sutindih miwah satinut ring kawéntenan lembaga basa Bali sané mawibawa.  Taler ring pagubugan para yowana, penyuluh basa Bali prasida pinaka pangiyus utawi raos mangkin kabaos infuencer sajeroning mabasa Bali.

Yéning sampun prasida sakadi asapunika, mabasa Bali jagi katon luih turmaning ngwetuang rasa bangga ring manah para yowana. Asapunika taler linggih lembaga bahasa, aksara, dan sastra Bali jagi sayan kapikukuhang ring arsa sameton Bali, turmaning kacumponin pinaka sang angawérat sajeroning kapatutan basa, aksara, wiadin sastra Bali.

Pungkuran krama Bali pacang sayan cacep mabasa Bali, miwah ngunggahang aksara Bali pinaka silih tunggil kahanan Bali era baru.

Kari wénten madué pikobet ring basa Bali? Hubungi Lembaga Bahasa, Aksara, dan Sastra Bali!

I Gusti Bagus Wéda Sanjaya
guru Basa Bali ring SMA Negeri Bali Mandara. Kakawian dané naanin kawedar ring Bali Post miwah Suara Saking Bali