Anyar
Olih:
IDG Trinandita
![]()
I Déwa Gedé Trinandita
urati lan seneng ring parikrama Bali.
 |
| Sumber Gagambaran; www.carredartistes.com |
Anyar maartos baru. Wénten
Warsa Anyar, Baju anyar, lan sané tiosan. Maosang anyar utawi baru. Minabang
sami jatmané jagi seneng. Sekadi maduwé mobil anyar, baju anyar, sepatu anyar,
sepeda anyar lan setios nyané. Yéning pinehin anyar punika wantah sangkanin wau
kapolihang, wau kacingak, wau kakaryanin lan wau pragat. Anyar punika wantah
galah sané ngawinang. Memargi galahé sinah sami sané mawasta anyar pastika jagi
matilar. Mobil anyar dumun sané mangkin dados mobil kuno, sepéda anyar sané
dumun mangkin dados sepéda antik, warsa anyar sané wau ngalintang benjangan
dados warsa ilu.
Duaning asapunika
sepatutné jatmané tan perlu nyumbungan raga utawi bangga pisan nyantenang
separi indik sané kabaos anyar punika. Sané patut kadadabin wantah sané anyar
punika patut kapiara, keanggé sekadi patut sumangdané napi sané anyar punika
nénten gelis usak nénten gelis uug lan awét. Yéning marupa barang utawi perabot
patut kapiara becik-becik. Yéning marupa ajeng-ajengan patut kasimpen utawi
genahang sekadi patut. Yéning ajeng-ajengan anyar genahang nénten patut bisa
ngawinang masem raris yéning ajeng sinah ngawinang sungkan napi malih yéning
ajeng-ajengané punika nénten matekep sinah buyung jagi rauh nyebarang
panyungkan.
Raris yéning lanturang
sekadi jatmané sané makurenan sinah wénten sané kasengguh pengantin anyar.
Wénten kabaos bulan madu. Rikanjekan punika sinah rasa anut lan adung sané
karasayang tur kalaksanayang sareng kalih. Mamargi galahé pangantén anyar
punika kasuwén-suwén sinah nénten malih sekadi asapunika. Raris métu sampun sané
mawasta pikobet rumah tangga. Yéning anyar sané satata ajumang sinah risampuné
nénten dados kaséngguh anyar sinah jagi kakutang. Indiké puniki patut kayunin
becik-becik. Sumangdané yéning nirgamayang sekadi anaké makurenan nénten ja
patut médayang anyar lan buuk. Riantukan makurenan punika wantah nunggilang
jatma lanang-istri antuk upacara manusa yadnya mawidiwidana sareng kalih
nemuang semara ratih niténin sané kawastanin gréhasta asrama. Punika patut
kapiara. Yéning bandingan sekadi numbas kuaca minabang nénten pateh mapan
yéning kuaca sané wau katumbas kasengguh pinaka kuaca anyar raris kasuwén-suwén
menados kuaca buuk, kumel, kesét, daki raris kakutang. Minabang puniki sampun
lumrah lan nénten mapisalah.
Puniki wantah gendu
wirasa, sakémawon yéning uratiang minabang tetueknyané patut kapikayunin.
Yéning cutetang gendu wirasa puniki nguningayang sumangdané sami mapikayunin.
Minab patut taler kawikanin anyar punika magenah ring kayun. Sakadi numbas
motor bekas yéning sané ngadol minabang rumasa motor punika sampun buuk utawi
jelék sakémawon sang sané numbas rumasa motor sané katumbas punika wantah
kantun anyar utawi baru. Macihna jatmané maduwê rasa angayubagia ring
kahuripanné. Nénten kabanda ring sané kabaos anyar punika. Taler motor sané lawas sakéwanten kari becik
mesin, pelaib nyané mejanten durung patut kagentos. Sumangdané tan kasengguh
boros utawi ajum. Minabang jatmané patut niténin kahuripan antuk ngawigunayang
sané kari dados kawigumayang lan nénten lipia ring angga. Nénten satata
ngaruruh lan nyumbungang sané kawastanin anyar kémanten.
urati lan seneng ring parikrama Bali.
No comments