Puisi-puisi Madé Oktayana P.; Ten Lulus
Ten Lulus
Sampun nénten katanggehin
Napi malih kaengkebin
Makudang-kudang sedih
Sané ngawinang pesu éling
Mangkin tan prasida malih
Jagi nuturin
Sampun kadong katolih
Nika ring papané putih
Nilai sané nénten luwih
Ngawing anakéh sané pakekelih
Anaké ngeling
Ulian nilai sané sami pelih
Jnana Bhakti
Mungguh ring sastra
Sané mawasta dharma
Kautaman jnana
Malarapan antuk agama
Sané pinih sutresna
Mangda dados jadma maguna
Pamarginé rikala hidup
Mangda sami kertha rahayu
Dasarin antuk papineh sané utama
Jnana bhakti anggén jalanan
Subhakti ring HyangWidhiWasa
Setata wénten ring pamargin Ida
Manah suci nirmala
Nedunang pabaos sané ngetisin
Sekancan jadma
Laksana sané madasar dharma
Pinaka dados swadharma
Ngamargiang kautaman jnana
Ngiring sareng sami
Mlajahang idep
Antuk jnana sané pinih utama
Minakadi dados bhakti
Majeng ring HyangWidhiWasa
Mangda sami ngaruruh moksa
Widya Guna
Kautaman sastra ring gumi
Sampun kaloktah dagingnyané
Makasami sastra mungguh widya
Sané madué sasuluh
Rikala ngamargiang hidup
Akéh jadma manusa mlajahin
Ngarereh papineh sané pinih beneh
Widya sané madasar dharma
Anggé ngamargiang swadharma
Rikala dados manusa
Nanging sané mangkin
Widya sané maguna
Sampun nyansan surud
Sampun sayan tios
Kagunan widya ring gumi
Jadma sané mlajahang déwék
Sesampuné uning ring sastra
Sampun mawasta bisa
Dados widyané punika
Anggéna nguluk-nguluk anak
Matiosan ring pamargi
Kagunan widya sané pinih utama
Ngiring suluhin mangkin
Akéh wénten anak sané dueg
Kémaon duegné punika
Anggéna nguluk-nguluk timpal
Akéh anak sané bisa
Kéwala bisa ngaé huruara ring gumi
Ngiring tirtanin sareng sami
Rereh pamargi sareng sami
Suluhin sareng sami
Mangda nénten sayan nglimbak
Ring pamargin widya di guminé
Widya sané maguna
Mangda dados dharma sané utama
Ngarereh sastrasané weruh
Ring angga sinengguh
Werdiang maring damuh
Mangda becik kapangguh
Wyakti punika sané mungguh
Sayan aluh
Sakémaon mangkin tumbuh
Ring galah éwuh
Ngancan sawuh
Ten medaging turuh
Sampun tinuwuh
Ring gemuh
Suksma sampun ruruh
No comments