Jero Daha

Olih: I Wayan Pandé Sumardika

 

"Wanita Bali Duduk" Gagambaran Roland Strasser

Jero daha ,

Yén wenginé sampun rawuh

Yukti tuyuh kasinangguh

Serantaban sang suhun bincuh

Jero daha,

Sang ayu kusuma dalu

Ring ratri manglalu

Megeng pandulu

Jero daha,

Nuluh marga lanjar

Nuju telenging pasar

Ngruruh daging dadahar

Jero anak daha,

Pinaka sasana urip

Uripé ngyasaang urip

Nénten ngardi sisip

Jero ,,,

Sang ayu daha ring pasar

Élingang ragané wawu mekar

Durung sandang déwa majigar

Ketél peluh bukti tuyuh

Ngulati sané karuruh

Ring muda malajah suluh

Bénjang lingsir tan malih binguh

Duh sang ayu,

Kusumaning wengi

Ngiring mangkin mawali

Wusan dumun iriki 

Lemah lemeng sampun prapti

Bénjang ungkur malih mariki

Wangdusun,16'9