Puisi-puisi Sang Madé Tresna Wicaksana; Indria ring Kali Yuga

Sumber Gagambaran AA Gde Agung Jaya Wikrama, Sumber; matramantra.wordpress.com

I Tukang Pacul

Jegjeg tangkah lan tekek limane ngisi pacul,
satmaka prawira ngagem gada
I rika ring rananggana pangupa jiwa,
maperang ngadepin baret angin kahuripanné
tameng kesiran anginé sampun lebur,
kagebug kebyakan panas surya sané nyentar
kadi ayuta panah sané durus nancepin carma,

Wéntenkéh sané rungu?
Kala ipun magutit ring carik
Duk sanga yuta wadua peluh medal ninggalin sang carma
Pakeh peluhnyané nyihnayang pakeh urip sané kamargiang
punika pinaka bulih-bulih sané benjangan pacang medal saking pertiwi
pinaka amerta anggén nglanturang urip i raga sareng sami

Durus aksi!
i tukang pacul kapecik, kacekik olih ajin rabuk
Tanah lan toyane milu mucingin,
i walang sangit lan i bikul milu ngrusuhin,
Bénjang pungkuran yén i tukang pacul ngunggahanng kober petak,
Sira sané pacang makenta?



Indria ring Kali Yuga

Bibihé mangkin sampun caket ngraosang dharma
Kupingé mangkin sampun bongol miarsayang krimik manah
Kalih tanganné sampun tan sida makarya melah
Idepe sampun tan mresidayang mepineh rahayu
Ring i riki
Genah sarwa bibih sané makenyem bogbog
Genah sané wantah ngajiang raga
Genah sané ngwaregin basang pedidi
Genah sané nyungsung momo angkara
Genah sarwa Penyingakan sane tan suka ngaksi anak bagia
Dija ilang genahé dumun?
Genah silih asih…
Genah saling pakenyung…
Genah masawitra…
Genah manyama braya…
Genah sané santi lan jagadhita…
Ratu Betara,
Makakalih Batis puniki tan mresidayang ngatehang pesu saking genah driki, durusang, ancit tiang saking driki…..


No comments