Puisi-puisi Ni Luh Gedé Listya Déwi; Lumbung Padi Ngalekas dados Pabrik Besi

Sumber Gagambaran; glorygallery.co.id

Lumbung Padi Ngalekas dados Pabrik Besi

Tabanan sané nguni

Tabanan sané ngalangunin hati

Genah sané kaucap lumbung padi

Tabanan sane akeh budaya lan seni

            Tabanan nguni

            Tabanan sané nénten polusi

            Dahat kasub ring jagat gumi

            Genah sané asri lan lestari

Nanging jani

Genah sané kaucap lumbung padi sampun ngelekas

Carik lan tegalan kagusur dados pabrik beton lan besi

Tabanan sane asri lan lestari kaganti dados polusi

            Iraga dados pamuda lan pamudi

            Sakadi satria wira dados meseh

            Ngembaliang genah sane kaucap lumbung padi

            Apang Tabanan mangda ajeg lan lestari

                                                                                               

Don Suci

Don bingin

Don sané kasakralin ring jagat Bali

Punyan kayune tumbuh tegeh ngoléd nyunjung langit

Don sané maguna anggo kauripan ngawit

            Donnyané kaanggo mayadnya

            Donnyané maguna ngaénang jagat lestari

            Sumber oksigén dados buron lan manusa sami

            Punyan kayuné nyejukin jagat

Buka don binginné

Iraga dados jadma mangda eling

Diastun cerik nanging maguna anggo kauripan

Diastun cenik yéning bareng-bareng malaksana melah pasti maguna

            Yadiastun tumbuhnyané tegeh

            Nanging tetep nyikiang pikayun mangda maguna tumbuh ring jagat

            Diastun cerik yéning sampun nyikiang pikayun

            Lakar maguna

Apang tusing cara jani

Jaman démokrasi

Madémo tusing géngsi

Ten rungu tekén nyama di sisi

            Iraga mangda sami nyiki

            Apang dados mabukti

            Raga siki

            Jagat Bali…

Jagat sané akéh tradisi

Akéh budaya lan seni

Sakadi don bingin, cerik-cerik

Nanging kasub ring jagat sami

Ni Luh Gedé Listya Déwi
Sisia SMPN 5 Baturiti, juara 2 nyurat puisi Jineng Sastra.