Puisi-puisi Erkaja Pamungsu; Bembengan Agung Warisan Gumi
 |
| Potrekan Widhi Setianingsih |
Bembengan
Agung Warisan Gumi
Maséhi…
Asta bumi manggeseng sembah
Bembengan agung batu selem kabiséka
Ring pada sekala niskala
Kadegang olih Sang Cakrawartin
Pinaka warisan gumi aor
Saking wétan, kidul, kulon, lor
Bagia…
Wong Banua ngantung alaksa cita
Manunas ica mayasa kérti
Mabakti ngelarang aci
Moga sayan masambeh arta amrta
Nambakin roga sanghara
Ngampihan sarwa lara
Raris…
Siu keti jadma mangalih rauh
Mongkod munggah ka muncuk ngetuh
Masambilan ngalih sundih Hyang Surya
Candra
Mabalih bintang masaput kabut
Kaluhur meluk angin
Nguberin langu, saling adu manyiku
Nyeksekang luu di selagan-selagan batu
Nyuksuk bantang bagasé tuh
Nyandingin bias selem nyampuh
Gunung Batur, April 2018
Bembengan
Agung Warisan Gumi (2)
Nem tiban majalan
I Krama wingkang tan manggihin sané
kapti
Nyén salah?
Nyén né ngelah?
Kija pajalan Sang Rupiah?
Bembengan agung lanyah, krama wingkang
kantun layah!
Ring wingkang kramané nunas pica
Ring geger matanduran mangda seger
Ring tepi siring bembengan urip kramané
kamaling
Ring uluning agra kramané saling palu
nyambung bayu
Nyén né ngelah?
Nyén né layah?
Nyén né benyah?
Nyén né punyah?
Nyén né salah?
Ané ngelah!
Ané nyangkah!
Ané pangkah!
Ané campah!
Gunung Batur, April 2018
Puun
Panes ngabérbér
Nemu sasih Kapat-Kalima
Nandusin ancang cemara-cemara ligir
Nyilapin padang bagas lan bantang prupuk
tuh
Manusdus batu bias
Lantas mangilab manadi api
Andus makupuk menék
Nyujuh langit katimpalin angin baret
makuus
Sampil nadah sarwa tumuwuh
Puun...
Puun...
Punn...
(Apiné mangeseng ri kala bunga manedeng
Andusé malaib matur ring Bapa Akasa
Ibu Pratiwi rindu nyantosang ulung Hyang
Labuh)
Denpasar, Oktober 2018
Wukir
Samirana
Di gegering Wukir Samirana
Kramané maniti jan-jan tiing cenik di
mel
Matimpal kaluné mategul di bangkiang
Batis lalungan menék nuju muncuk
matetimbal
Ngémpok bungan-bungan cengkéh né miik
mangalub
Di duur
Osehan anginé sing dadi tenungin
Kincang-kincung limané inceg pada mikpik
Makadua ibuk ngampad bungan-bungan
cengkéhé miik
Kagandong aba mulih anggo nimuh urip
Di betén
Buin kapikpik sibakin
Padasaan nak cenik milu ibuk mangémpok
Pada anteng macanda ngajak timpalné
saling sogok
Ngelésang bungan cengkéh uling bantang
cenik
Kapilpilang lan kampihang
Kajemuh menék tuun di langgatan tukub
Kanti layu, kanti tuh
Di betén panes matan ainé manyorcor
Di gumi landuh Wukir Samirana
Sembiran, Agustus 2016
Patitip
Telagané ening maka saksi
Paiketan luwih para lelangit duk riin
Sané ngiket angkihan krama makadua
Maka bala wadu Gebog Kunané
Duk riin,
Lelangit sang rwa pada manunas wariga
Nerawang panyumu Saka Warsa
Anggén ngamargiang bakti muah aci ring
Ida Bhatara
Ring panguluning Giri Danu
Mawinan tan dados kapalasang
Maka gegaduhan krama Banua Kuna
Paiketan getih bala wadu Banua Aga
Panjak Hyang Mahaguru Haji Dalem
Sané sampun moksah ring suwung
Né ada lontar Palelindon
Patitip Hyang Lelangit
Né pidan anggén mameték langit
Jelé melah gumi yéning wénten lindu
Hredaya para lelangit ring kuna
Aba, katitipang ring cening
Sembiran, Agustus 2016
alumni FIB Unud, lan magenah ring Bangli. Mangkin makarya dados wartawan Pos Bali.
No comments