Janji
Olih: Gusti Lanang Sutéja Naréndra
I Gusti Lanang Sutéja Naréndra
magenah ring Karangasem.
 |
| Sumber Gagambaran; iniblogsaia.blogspot.com |
Pidan
dugas metunangan, taén tiang majanji kéné, “Luh, yén Nyai
nyak makurenan ajak Bli, Bli mejanji lakar ngalapang bintang papitu!”
Dugasé
ento, sing ada ia protés. Malah nyumingkin ia nyelédoh manying sada
ngeraos badil buka raréné baang kembung-kembungan.
“Aiiiiihhhh...
Bli lomantis ati-ati. I Luh cayang jak Bli,” kéto ia misi niman nyupcup
busan-busan. Nyansan girang kenehé, buka anaké mamancing amahin bé gedé.
Nyumingkin pesu gombalé.
“Di
paningalané jang dadua. Anggo anting-anting dadua. Anggo mainan
kalung besik. Anggo cincin buin dadua,” kéto raos tiangé sambil
nyolék-nyolék pipi. I Luh nyansan lélor!
Sakéwala
jani disubané makurenan, raosé ento sai-sai oléoléanga. Yén ada kuangan pasti
bibihné munju laut ngeraos kéné, “Kalingké lakar ngalapang bintang
pepitu, tagihin amun to dogén sing misi bana!”
Béh,
begbeg kéto dogén ngaé basang mamanes. Singké I Luh ngerti raos nak
metunangan, mula gebuhan bedik? Anak memancing mula misi
barén, diastu baréné palsu. Disubané béné di dungkiné, apa
puarané maang barén?
Ibi
sanja buin raosé ento pesu. Sambila mamasker bengkuang, buka topéng
sidakarya muané, ia ngarémon kéné, “Kalingké lakar ngalapang bintang
pepitu, tagihin kekécér ka salon dogén enu pucingina. Pusing tendasé
ngelah kurenan gebuh buka sélané matambus!”
Tiang
bengong. Siup kopiné ladné manis dadi pahit makilit. Kisik-kisik tiang
nyeluk kantong, enjuhin tiang I Luh BINTANG TOEJOE.
“Néh, janjiné
lunas!”
(Macang
Rumah Cinta Seribu Jendela)
I Gusti Lanang Sutéja Naréndra magenah ring Karangasem.
No comments